مصر کی جانب سے غزہ کے بارے میں امریکی و صیہونی منصوبے کی مخالفت
مصری حکومت نے غزہ کے انتظامات سنبھالنے کی صیہونی اعلی عہدیدار کی تجویز کو مسترد کر دیا۔
سحرنیوز/دنیا: غزہ میں مستقل جنگ بندی اور انتظامی امور کے بارے میں صہیونی حکومت اور امریکہ کے منصوبوں کو خطے کے ممالک مسترد کر رہے ہیں۔
تفصیلات کے مطابق صہیونی حزب اختلاف کے رہنما یائرلاپید نے مصر کو غزہ پر آٹھ سال حکومت کرنے کی تجویز پیش کی تھی تاہم قاہرہ نے اس منصوبے کی مخالفت کا اعلان کیا ہے۔ مصر کے باخبر ذرائع نے نام ظاہر نہ کرنے کی شرط پر بتایا ہے کہ قاہرہ غزہ پر حکومت کرنے کے کسی بھی منصوبے کو مسترد کرتا ہے اور اس کا فیصلہ فلسطینیوں کو کرنا ہے۔
لاپیڈ نے کہا تھا کہ غزہ کی تعمیر نو کے دوران مصر آٹھ سال تک انتظامی امور سنبھالے گا۔ یہ مدت پندرہ سال تک بڑھائی جاسکتی ہے۔ صہیونی رہنما نے اس پیشکش کو قبول کرنے کی صورت میں مصر پر واجب الادا ایک سو پچپن ارب ڈالر کے غیر ملکی قرضے معاف کروانے کا عندیہ دیا تھا۔
