ویتنام: سمندری طوفان کی وجہ سے صدیوں پرانے جہاز کا ملبہ مل گيا
اطلاعات کے مطابق سمندری طوفان ’کلمیگی‘ کے باعث شدید ساحلی کٹاؤ نے ویتنام میں صدیوں پرانے ایک جہاز کا ملبہ ظاہر کر دیا ہے۔
سحرنیوز/دنیا: میڈیا رپورٹوں کے مطابق ویتنام میں سمندری طوفان ’کلمیگی‘ کی وجہ سے صدیوں پرانے ایک جہاز کا ملبہ نظر آنے لگا ہے جس سے ماہرین کو ایک موقع ملا ہے کہ وہ ایک ایسے تاریخی ورثے کو محفوظ کر سکیں جو بقول ان کے انتہائی اہمیت کا حامل ہو سکتا ہے۔
فرانسیسی خبر رساں ادارے ’اے ایف پی‘ کی رپورٹ کے مطابق یہ جہاز پہلی بار 2023 میں "ہوئی آن" کے ساحل کے قریب دریافت ہوا تھا۔ کم از کم 17.4 میٹر (57 فٹ) لمبا یہ جہاز تقریباً مکمل حالت میں محفوظ پایا گیا، جس کا مضبوط لکڑی کا ڈھانچہ صدیوں تک سمندری طوفانوں اور لہروں کا مقابلہ کرتا رہا تاہم حکام کے بازیابی سے پہلے ہی اسے دوبارہ سمندر نے ڈھانپ لیا تھا۔
ماہرین نے اب تک اس ملبے کی درست تاریخ کا تعین نہیں کیا ہے لیکن ابتدائی نتائج سے ظاہر ہوتا ہے کہ یہ 14ویں سے 16ویں صدی کے درمیان تعمیر کیا گیا تھا۔ یہ وہ زمانہ تھا جب یونیسکو کی عالمی ورثہ فہرست میں شامل شہر ہوئی آن ریشم، مٹی کے برتنوں اور مصالحہ جات کی علاقائی تجارت کا مرکز تھا۔
ہوئی آن کے عالمی ثقافتی ورثے کے تحفظ کے مرکز کے ڈائریکٹر فام فو نگوک نے بتایا کہ ہم فی الحال ایک ہنگامی کھدائی کی اجازت کے لیے درخواست تیار کر رہے ہیں۔
انہوں نے کہا کہ اس قدیم جہاز کی دریافت ہوئی آن کے علاقائی تجارت میں تاریخی کردار کا واضح ثبوت ہے اور یہ کہ اس بار جہاز کا زیادہ حصہ ظاہر ہوا ہے، جو ہمیں مزید معلومات فراہم کر سکتا ہے۔
