امریکہ: منیاپولس میں سیکورٹی فورس کی فائرنگ سے امریکی شہری کے قتل کے بعد وسیع احتجاج، شہر میدان جنگ میں تبدیل

Jan ۲۵, ۲۰۲۶ ۱۷:۰۹ Asia/Tehran

امریکی ریاست مینے سوٹا کے شہر منیاپولس میں سیکورٹی فورس کی فائرنگ سے ایک امریکی شہری کے قتل کے بعد ایک بار پھر عوامی احتجاجی مظاہروں میں شدت آگئی ہے۔

سحرنیوز/دنیا: سی این این کی رپورٹ کے مطابق امیگریشن پولیس کے ہاتھوں مہاجروں کے خلاف پُرتشدد اور بے رحمانہ اقدامات کے بعد منیاپولس میں لوگ سڑکوں پر نکل آئے جس کے بعد امریکی وزیر جنگ نے منیاپولس میں فوج اتار دی اور شہر میدان جنگ میں تبدیل ہوگیا۔

مشتعل مظاہرین کو منتشر کرنے کے لیے سیکورٹی فورس نے آنسو گیس اور صوتی بموں کا استعمال کیا۔

اطلاعات کے مطابق گزشتہ روز ایک امریکی سیکورٹی افسر نے منیاپولس شہر میں مظاہروں کے دوران ایک امریکی شہری کو گولی مارکر قتل کردیا تھا۔ رپورٹ کے مطابق منیاپولس میں مظاہروں کے دوران سرحدی سیکورٹی افسر کی گولی سے مرنے والا شخص امریکی شہری تھا اور اس کی عمر 37 سال بتائی گئی ہے۔ ہلاک شدہ امریکی شہری ایلکس پریٹی ایک ہسپتال میں نرس کے طور پر خدمات انجام دیتا تھا۔

امریکہ کی قومی سلامتی کے ادارے نے دعویٰ کیا کہ ہلاک ہونے والے شخص کے پاس سے نیم خودکار ہتھیار برآمد ہوا ہے۔

منیاپولس شہر کے بحرانی حالات کے انتظامی ادارے کی سربراہ ریچل سیر نے شہر کی صورت حال کو ہولناک قرار دیا ہے۔

ہمیں فالو کریں:

ادھر امریکی رکن کانگریس ایلیگزینڈریا کورٹیز نے کہا ہے کہ امریکی شہری اپنی حکومت کے ہاتھوں قتل ہو رہے ہیں، امریکہ کا آئین تحس نحس ہو رہا ہے اور ہمارے حقوق پامال ہو رہے ہیں۔