ایران اور امریکہ کے بالواسطہ مذاکرات تعمیری رہے، دوسرا دور سنیچر 19 اپریل؛ عراقچی
وزیر خارجہ سید عباس عراقچی نے عمان میں امریکی صدر کے خصوصی ایلچی کے ساتھ بالواسطہ مذاکرات کی کچھ تفصیلات پیش کیں۔
سحرنیوز/ایران: ایران کے وزیرخارجہ سیدعباس عراقچی نے کہا کہ مذاکرات تقریبا ڈھائی گھنٹے تک جاری رہے اور اس دوران عمان کے وزیر خارجہ البوسعیدی نے 4 بار دونوں وفود کے ہالز کے بیچ پیغامات کا تبادلہ کیا۔ ایرانی وزیر خارجہ نے کہا کہ مذاکرات انتہائی احترام کے ساتھ انجام پائے اور کسی غیرمناسب لہجے یا نازیبا الفاظ کا استعمال نہیں ہوا۔
سید عباس عراقچی نے بتایا کہ فریقین نے مذاکرات کو مزید آگے بڑھانے اور دونوں فریقوں کے مدنظر معاہدے کے حصول پر اتفاق کیا۔
انہوں نے کہا کہ آئندہ ہفتے سنیچر کے روز مذاکرات کا دوسرا دور منعقد ہوگا جس میں ممکنہ طور پر معاہدے کے اصولوں پر غور کیا جاسکتا ہے۔ وزیر خارجہ عراقچی نے کہا کہ یہ سلسلہ کہاں تک آگے بڑھ سکتا ہے، دیکھنا ہوگا۔
انہوں نے مزید کہا کہ ہم بے حاصل مذاکرات اور گفتگو اور وقت ضایع کرنے والی بات چیت کے خواہاں نہیں ہیں اور بظاہر امریکی فریق کو بھی اس میں کوئی دلچسپی نہیں۔
