ایران اور سعودی عرب کی مسلح افواج کے تعلقات میں فروغ علاقے کے استحکام کا باعث ہے: میجر جنرل محمد باقری
ایران کی مسلح افواج کے چیف آف اسٹاف میجرل جنرل محمد باقری نے کہا ہے کہ ایران اور سعودی عرب کی مسلح افواج کے تعلقات میں فروغ علاقے کے استحکام کا باعث ہے۔
سحرنیوز/ایران: میجرل جنرل محمد باقری نے سعودی عرب کے وزیر دفاع کا استقبال کرنے کے بعد مشترکہ اعلی سطحی نشست میں کہا کہ بیجنگ معاہدے کے انعقاد کے نتیجے میں ایران اور سعودی عرب کی مسلح افواج کے مابین بھی تعلقات بڑھتے جا رہے ہیں۔ انہوں نے کہا کہ اسلامی جمہوریہ ایران کی اصولی پالیسی ہمسایہ ممالک کے ساتھ تعلقات پر مبنی ہے اور ایران اور سعودی عرب کی مسلح افواج کے روابط، علاقے کے دیگر ممالک کے لیے بھی مشعل راہ ثابت ہوسکتے ہیں۔ چیف آف اسٹاف باقری نے کہا کہ اسلامی جمہوریہ ایران اس بات پر زور دیتا ہے کہ علاقے کی سلامتی کی ضمانت، خطے کے ممالک کو ہی فراہم کرنا چاہیے۔ میجر جنرل محمد باقری نے غزہ اور فلسطین کے سلسلے میں سعودی عرب کے موقف کو سراہتے ہوئے کہا کہ صیہونی حکومت کے جرائم کا مقابلہ کرنے کے لیے اسلامی ممالک کو اتحاد، ہمدلی اور یکجہتی کا مظاہرہ کرنا چاہیے۔ چیف آف اسٹاف نے زور دیکر کہا کہ دونوں ممالک کے دوستانہ سیاسی اور فوجی تعلقات دوستوں کی خوشی اور دشمنوں کی مایوسی کا باعث بنیں گے۔
سعودی عرب کے وزیر دفاع خالد بن سلمان نے اس موقع پر اسلامی جمہوریہ ایران کی سیاسی اور فوجی قیادت کی میزبانی کا شکریہ ادا کرتے ہوئے سعودی عرب کے بادشاہ کا سلام پیش کیا اور کہا کہ سعودی عرب شدت سے تہران اور ریاض کے تعلقات میں فروغ کا خواہاں ہے۔ انہوں نے اپنے دورہ تہران کے نتائج کی جانب سے پرامید ہونے کا اظہار کیا اور کہا کہ مختلف میدانوں میں دونوں ممالک کے تعلقات میں فروغ علاقے کے عوام، اسلامی ممالک اور خطے کی سلامتی کے لیے انتہائی مفید ثابت ہوگا۔
