روس کا دورہ کامیاب، اگلے ہفتے چین جانے کا اعلان؛ ایرانی وزیر خارجہ
وزیر خارجہ سید عباس عراقچی نے اپنے دورہ روس کے اختتام پر بتایا کہ وہ آئندہ ہفتے چین کی قیادت سے مذاکرات کے لیے بیجنگ جا رہے ہیں۔
سحرنیوز/ایران: ایران کے وزیرخارجہ سید عباس عراقچی نے اپنے دورہ روس کے اختتام پر کہا کہ آئندہ مہینوں کے دوران ایٹمی معاملے پر ایران اور امریکہ کے بالواسطہ مذاکرات ایک نئی صورت اختیار کرلیں گے جس میں روس کا کردار بہت اہم اور تعمیری ہوسکتا ہے۔ انہوں نے بتایا کہ پوتین سے ان کی ملاقات اور گفتگو ڈیڑھ گھنٹے سے زیادہ تک جاری رہی اور تقریبا تمام دوطرفہ دلچسپی کے امور پر بات چیت ہوئی۔
سید عباس عراقچی نے صحافیوں کو بتایا کہ روس کے صدر کو ڈاکٹر مسعود پزشکیان کی جانب سے تہران کے دورے کی بھی دعوت دی جو مناسب وقت پر انجام پائے گا۔ وزیر خارجہ نے کہا کہ علاقائی اور بین الاقوامی معاملات ایران اور روس کے لیے مزید واضح ہوچکے ہیں اور ہمارے باہمی تعلقات اچھی نہج پر آگے بڑھ رہے ہیں۔
سید عباس عراقچی نے کہا کہ ایران اور روس دونوں سخت پابندیوں کی زد میں ہیں جس سے نمٹنے کے لیے نئے مشترکہ طریقہ کار پر عمل کیا جا رہا ہے۔
