ایران اور ہندوستان کے وزرائے خارجہ کی ملاقات
ایران اور ہندوستان کے وزرائے خارجہ نے نئی دہلی میں ایک اہم ملاقات کی جس میں دوطرفہ تعلقات سمیت علاقائی اور بین الاقوامی امور پر تبادلہ خیال کیا گیا۔
سحرنیوز/ایران: ہمارے نمائندے کی رپورٹ کے مطابق ایران کے وزیر خارجہ عباس عراقچی اور ان کے ہندوستانی ہم منصب جے شنکر نے جمعرات کی صبح ملاقات کی۔ اس اہم ملاقات میں ایران اور ہندوستان کے وزرائے خارجہ نے دوطرفہ تعلقات میں ہمہ جہتی دوطرفہ روابط کے فروغ اور کسٹم ، خوراک نیز حفظان صحت کے شعبوں میں دوطرفہ تعاون کی دستاویزات پر دستخط پر تاکید کی۔
شنگھائی تعاون تنظیم اور برکس جیسی اہم تنظیموں کے رکن ہونے کے ناطے ایران اور ہندوستان ان تنظیموں کے درمیان تعاون بڑھانے کے طریقے تلاش کر رہے ہیں اور اپنے تعلقات میں موجودہ صلاحیتوں سے بہرہ مند ہونے کی کوشش کر رہے ہیں۔
نئی دہلی پہنچنے پر عراقچی نے امید ظاہر کی کہ ہندوستان اور پاکستان خطے میں مزید کشیدگی سے بچنے کے لیے ضبط و تحمل کا مظاہرہ کریں گے۔ انہوں نے کہا کہ ان کا دورہ ایک طویل المدتی منصوبے کا حصہ ہے جس کا مقصد دونوں ممالک کے مابین مشترکہ اقتصادی کمیشن کا اجلاس منعقد کرنا ہے۔ عراقچی نے کہا کہ ایران اور ہندوستان کے درمیان اہم علاقائی اور بین الاقوامی معاملات پر سیاسی مشاورت کا سلسلہ جاری ہے۔
انہوں نے مزید کہا کہ وہ اپنے ہندوستانی ہم منصب سے علاقائی امور پر بات چیت کریں گے اور خطے میں کشیدگی میں کمی اور امن کے فروغ پر زور دیں گے۔
