غزہ میں وحشتناک ترین نسل کشی، جرمن نازیوں کی یاد تازہ ہو گئی؛ ایران کی پارلیمنٹ کے اسپیکر
اسلامی جمہوریہ ایران کی پارلیمنٹ کے اسپیکر نے کہا ہے کہ غزہ میں صیہونی حکومت کے اقدامات نے نازیوں کے جرائم کی یاد تازہ کردی اور اسرائیلی حکومت کے مقابلے میں تاخیر اکیسویں صدی کے نازیوں کے جرائم میں مشارکت کے مترادف ہے۔
سحرنیوز/ایران: ایرانی پارلیمنٹ کے اسپیکر ڈاکٹر قالیباف نے منگل 29 جولائی کو جنیوا میں اقوام متحدہ کے منشور اور بین الاقوامی قوانین کے تحفظ کے زیر عنوان اجلاس سے خطاب میں کہا کہ آج ہم اس ہال میں صرف باتیں کرنے کے لئے نہیں جمع ہوئے ہیں بلکہ ظلم کے اس طوفان کے مقابلے میں جو بشریت کو پستی کی طرف لے جارہا ہے، پرچم عدل و انصاف لہرانے کے لئے جمع ہوئے ہیں۔ انہوں نے کہا کہ غزہ میں ایسا المیہ جاری ہے جس کا موازنہ تاریخ بشریت کے سیاہ ترین صفحات کے علاوہ اور کسی چیز سے نہیں کیا جاسکتا۔
ڈاکٹر قالیباف نے کہا کہ ہمارا سامنا اکیسویں صدی کے نئے نازیوں سے ہے اور صیہونی حکومت مکمل منصوبہ بندی کے ساتھ کسی بات کی پروا کئے بغیر اتنے اطمینان سے وحشیانہ ترین جرائم کا ارتکاب کررہی ہے کہ گویا جرائم کی تاریخ کے خوفناک ترین ڈراؤںے خواب سے باہر نکلی ہے۔
ایرانی پارلیمنٹ مجلس شورائے اسلامی کے اسپیکر نے کہا کہ ان کی تقریر نسل کشی کے خلاف فریاد اور عالمی بیداری کی دعوت ہے۔ انہوں نے کہا کہ میں ایرانی قوم کی نمائندگی میں، اس کرہ خاکی کے ہر زندہ ضمیر انسان کی طرف سے مطالبہ کرتا ہوں کہ قبل اس کے کہ بشریت ظلم کے اس گرداب میں غرق ہوجائے، اکیسویں صدی کے نازیوں کو روکا جائے۔
