امام حسین علیہ السلام تمام مسلمانوں کےلئے مشعل راہ؛ ایرانی وزیرخارجہ
ایران کے وزیر خارجہ نے کہا ہے کہ امام حسین علیہ السلام کا معرکہ، ظلم کے خلاف جدوجہد اور قربانی کی لازوال مثال ہے، جو ہر مسلمان کے لیے مشعل راہ ہے۔
سحرنیوز/ایران: ایران کے وزیر خارجہ سید عباس عراقچی نے اربعین مارچ میں شرکت کے بعد اپنے پیغام میں کہا ہے کہ امام حسین علیہ السلام کی جدوجہد میں وہ ابدی سبق موجود ہے جو ہر مسلمان کو خصوصا دشمنوں کا سامنا کرتے وقت، دل سے سننا اور سمجھنا چاہیے۔ انہوں نے سوشل میڈیا پوسٹ میں لکھا کہ مجھے سعادت حاصل ہوئی کہ میں عاشقانِ اہل بیت اطہار علیہ اسلام کے اس بحرِ بیکراں کا حصہ بنوں، جو حضرت محمد مصطفیٰ ص کے نواسے کی یاد میں اربعین کے موقع پر کربلا میں جمع ہوتے ہیں۔انہوں نے مزید کہا کہ ہم عراق کے مقدس مقامات کو عتبات عالیات کہتے ہیں۔ یہ صرف اس لیے نہیں کہ یہ مقامات ہمیں آخرت کی یاد دلاتے ہیں، بلکہ اس لیے بھی کہ یہ ہمیں دکھاتے ہیں کہ کس طرح مختلف اقوام کے درمیان اخوت، ہم آہنگی اور یکجہتی ممکن ہے۔
سید عباس عراقچی نے امام حسین علیہ اسلام کی قربانی کو طاقت یا ذاتی مفاد کی جنگ کے بجائے ظلم و جبر کے خلاف ایک اصولی موقف قرار دیا اور کہا کہ امام عالی مقام کی بے مثال قربانی سے ہمیں یہ سبق ملتا ہے کہ جب دشمن ہمارے صبر، طاقت اور استقلال کو چیلنج کریں، تب حسینی فکر اور قربانی کو مشعل راہ بناکر سیسہ پلائی ہوئی دیوار بن جائیں۔
