ایرانی ٹرانسپورٹ وزیر اسلام آباد میں: دونوں ملکوں کے درمیان مواصلاتی رابطوں کو مضبوط بنانے کا عزم
اطلاعات کےمطابق ایران کی ٹرانسپورٹ اور شہری ترقی کی وزیر فرزانہ صادق نے ایران اور پاکستان کے درمیان مواصلاتی رابطوں کو مضبوط بنانے کے لئے ٹھوس اقدامات کے عزم کا اظہار کیا ہے۔
سحر نیوز/ ایران: اسلام آباد سے ارنا کی رپورٹ کے مطابق ایرانی وزیر فرزانہ صادق نے، جو علاقائی ٹرانسپورٹ وزرا کانفرنس میں شرکت کے لئے پاکستان کے دورے پر ہیں، خصوصی انٹرویو میں ایران اور پاکستان کے درمیان مواصلاتی رابطوں کو مضبوط بنانے کے لئے ٹھوس اقدامات کئے جانے پرزور دیا ہے۔
محترمہ فرزانہ صادق نے مواصلاتی رابطوں کو مضبوط بنانے کی غرض سے دونوں ملکوں میں پائي جانے والی صلاحیتوں سے بھرپور فائدہ اٹھانے کی ضرورت پر بھی زور دیا۔انہوں نے کہا کہ اسلام آباد میں علاقائی ٹرانسپورٹ وزرا کانفرنس کےدوران ٹرانزٹ اور کوریڈور رابطوں کو آسان بنانے کی کوشش کی جائے گی۔
ایرانی وزیر فرزانہ صادق نے مزید کہا کہ اس کانفرنس کے دوران، دو طرفہ اور کثیر الجہتی بات چیت ہوگی جس میں ٹرانزٹ سہولیات اور علاقائی کوریڈور جیسے معاملات سرفہرست ہیں۔
انہوں نے بتایا کہ ایران پاکستان دوطرفہ تعلقات کے میدان میں ٹرانزٹ اور روڈ ٹرانسپورٹ، کسٹم سہولت کاری اور ریلوے راستوں کی مرمت کے امور میں باہمی تعاون کو آگے بڑھانے کا ارادہ رکھتے ہیں۔
