سعودی عرب کی بمباری سے 3 یمنی شہری شہید
جارح سعودی اتحاد کی بمباری سے 3 یمنی شہری شہید ہو گئے۔
سبأنت خبر رساں ایجنسی کی رپورٹ کے مطابق جارح سعودی اتحاد نے صوبہ صعدہ کے سرحدی علاقے شدا کے رہائشی علاقوں پر توپوں کے گولے داغے اور ڈرون سے حملہ کیا جس کے نتیجے میں 3 یمنی شہری شہید ہو گئے اور اس علاقے کے رہائشی مکانات کو کافی نقصان پہنچا۔
جنگی طیاروں نے یمن کے دو صوبوں کے رہائشی علاقوں پر بھی بمباری کی۔
سعودی اتحاد کے جنگی طیاروں، ٹینکوں اور ڈرون کے کئی روز سے صوبہ صعدہ اور حضرموت کے رہائشی علاقوں پر بمباری کا سلسلہ جاری ہے۔ جس کے نتیجے میں متعدد مکانات تباہ ہوگئے۔ جارح سعودی اتحاد سات سال سے جاری اس جنگ کے دوران یمن کے رہائشی علاقوں کو مسلسل نشانہ بنا رہا ہے۔
یمن کے رہائشی علاقوں پر یہ حملے ایسے وقت میں کیے جا ر ہے ہیں جب یمن کی مسلح افواج کے ترجمان یحی السریع نے سعودی اتحاد کے ان دعوؤں کو سختی کے ساتھ مسترد کر دیا ہے کہ یمنی فوج، سول تنصیبات اور علاقوں کو فوجی مقاصد کے لیے استعمال کر رہی ہے۔ انہوں نے کہا کہ سعودی عرب اور متحدہ عرب امارات کے ان دعوؤں کا مقصد یمن کے رہائشی علاقوں پر جارحیت کا جواز تلاش کرنا ہے۔
یمن کی مسلح افواج کے ترجمان نے یہ بات زور دے کر کہی کہ جارح سعودی اتحاد یمن کی شہری تنصیبات اور مراکز کو نشانہ بنا کر بھی یمنی عوام کے حوصلوں کو شکست نہیں دے سکتا اور بلاشبہہ ان حملوں کا ہم ضرور جواب دیں گے۔ یمنی فوج اور عوامی رضاکار فورس اپنے ملک کے خلاف جارحیت کے جواب میں اب تک کئی بار سعودی عرب اور متحدہ عرب امارات میں، اہم فوجی اور اقتصادی تنصیبات کو اندرون ملک تیار کیے جانے والے ڈرون اور میزائیلوں سے نشانہ بنا چکی ہے۔
