حزب اللہ نے صیہونی ٹولے کو آئینہ دکھا دیا، ایک ویڈیو سے کھلبلی مچ گئی
حزب اللہ لبنان کے جوانوں نے اپنی تازہ ترین ریہرسل کی ایک ویڈیو جاری کی ہے جس میں انہوں نے ناجائز صیہونی ریاست کے ساتھ لگی اپنی سرحد پر خصوصی آپریشن کی ایک تصویر پیش کی ہے اور صیہونی حکام کے لئے واضح کیا ہے کہ وہ اسکے فوجیوں کا شکار کرنے کے لئے مکمل طور پر تیار ہیں اور اگر انہوں نے علاقے میں کوئی احمقانہ حرکت کرنے کی کوشش کی تو انہیں اسکی بھاری قیمت چکانا پڑے گی۔
سحرنیوز/عالم اسلام: تسنیم نیوز کی رپورٹ کے مطابق حزب اللہ لبنان نے 2006ء میں صیہونیوں کے ساتھ ہونے والی 33 روزہ جنگ میں اپنی کامیابی کی سالگرہ کی مناسبت سے 6 منٹ کی ایک ویڈیو ریلیز کی ہے جس میں صیونی فوج کے گولان بریگیڈ کے ایک اڈے پر حملے اور اس کی تباہی کو دکھایا گیا ہے۔ حزب اللہ لبنان نے اس ویڈیو کلپ کو ریلیز کرنے کے ساتھ ہی ایک بیان بھی جاری کیا ہے۔
اس ویڈیو کو صیہونی میڈیا میں خوب کوریج ملی ہے جس سے اس ویڈیو کے بعد صیہونی حکومت کو لاحق ہونے والی تشویش کا صاف پتہ چلتا ہے۔
صیونی ویب سائٹ حدشوت نے اس ویڈیو کے حوالے سےلکھا ہےکہ حزب اللہ کی جانب سے ریلیز کی گئی ویڈیو کے ایک حصے میں گولانی برگیڈ کے پرچم کو اکھاڑ کر اس کی جگہ حزب اللہ کے پرچم کو لگا کر اُسے لہراتے ہوئے دکھایا گیا ہے۔
کان ٹی وی کے رپورٹر نے حزب اللہ کی اس ویڈیو کے بارے میں کہا کہ حزب اللہ نے لبنان کی دوسری جنگ کی مناسبت سے رضوان بریگیڈ کی ایک کلپ نشر کیا ہے جس میں اسرائیلی کے زیر کنٹرول علاقے پر قبضے کی تصویر پیش کی گئی ہے۔
صیہونی ٹی وی 14 نے اس ویڈیو کے بارے میں کہا کہ حزب اللہ کے پاس 15 بٹالین ہیں جن میں شام کی جنگ سے واپس آنے والے 8 ہزار رضوان بریگیڈ کی اسپیشل سروسز کمانڈوز بھی شمال ہیں جو جنگ کے تجربات کے ساتھ اسرائیل کی سرحد پر موجود ہیں جب کہ حزب اللہ نے اپنے ڈرون ڈویژن اور ائیر ڈیفنس نظام اور اینٹی ٹینک نظام کو بھی بہت بہتر بنا لیا ہے۔
حزب اللہ کی جانب سے ریلیز ہونے والی کلپ میں دکھایا گیا ہے کہ رضوان بریگیڈ کی اسپیشل سروسز کے کمانڈوز صیہونی فوج کے ایک مرکز پر حملہ کرنے کے بعد اُسے تباہ کر دیتے ہیں۔
