غزہ کے جبالیا کیمپ پر صیہونی فوج کی بربریت، 60 سے زائد فلسطینی شہید
خبری ذرائع نے شمالی غزہ میں واقع جبالیا پناہ گزیں کیمپ پر غاصب صیہونی فوج کے حملوں میں ساٹھ سے زیادہ افراد کے شہید ہونے کی خبر دی ہے۔
سحرنیوز/عالم اسلام: غاصب صیہونی حکومت کی فوج نے غزہ پٹی میں ایک بڑا ارتکاب جرم کرتے ہوئے جبالیا پناہ گزیں کیمپ پر حملہ کرکے ساٹھ سے زیادہ افراد کو شہید کر دیا ہے۔ ادھر فلسطین کی وزارت صحت نے کہا ہے کہ صیہونی حکومت نے غزہ کے انڈونیشین ہسپتال کو مہلت دیتے ہوئے چار گھنٹے کے اندر اسپتال کو خالی کرنے کا وقت دیا ہے۔ جبکہ بعض خبروں میں کہا گيا ہے کہ صیہونی فوج نے انڈونیشین اسپتال کو جبری خالی کرانے کا عمل شروع کردیا ہے اور اس دوران صیہونی فوجیوں نے اسپتال کے ڈاکٹروں طبی عملے اور وہاں پناہ لئے ہوئے فلسطینی باشندوں کو بھی گرفتار کرلیا ہے۔ دریں اثنا، غاصب صیہونی حکومت کے جنگی طیاروں نے خان یونس کے مغرب میں شہر حمد کی ایک رہائشی عمارت کو نشانہ بنایا ہے جس کے نتیجے میں پندرہ افراد شہید اور پچیس زخمی ہوگئے ہیں۔
