غزہ کے بارے میں ٹرمپ کا متنازعہ بیان مسترد، خودمختار فلسطینی ریاست کے قیام پر زور؛ سعودی وزارت خارجہ
سعودی وزارت خارجہ نے امریکی صدر ٹرمپ کے متنازعہ بیان کو مسترد کرتے ہوئے کہا ہے کہ سعودی عرب آزاد اور خودمختار فلسطینی ریاست کے موقف پر قائم ہے۔
سحرنیوز/عالم اسلام: امریکی صدر ٹرمپ نے گذشتہ دنوں فلسطینیوں کو ان کے وطن سے نکالنے کے بارے میں متنازع بیان دیا تھا جس میں سعودی عرب کے مبینہ طور پر فلسطینی ریاست کے قیام سے دستبردار ہونے کا تاثر دیا گیا تھا۔ ٹرمپ کے بیان پر ردعمل دیتے ہوئے سعودی وزارت خارجہ نے ایک سرکاری اعلامیہ جاری کیاہے جس میں واضح کیا گیا ہے کہ ریاض بارہا اس بات پر زور دے چکا ہے کہ آزاد و خود مختار فلسطینی ریاست کے قیام کے بارے میں اس کا مؤقف مضبوط، مستحکم اور غیر متزلزل ہے۔
بیان میں مزید کہا گیا کہ ولی عہد محمد بن سلمان نے سعودی مؤقف کو بالکل واضح اور غیر مبہم انداز میں بیان کیا ہے جس کے بعد کسی قسم کی تشریح کی گنجائش نہیں۔وزارت خارجہ نے اس بات پر بھی زور دیا کہ ہم کسی ایسے منصوبے کو قبول نہیں کریں گے جس میں فلسطینیوں کو ان کے گھروں اور زمینوں سے بےدخل کیا جائے۔ اس بیان کے آخر میں کہا گیا ہے کہ ریاض اپنے مؤقف پر ثابت قدم ہے۔ مشرق وسطی میں حقیقی امن صرف اسی صورت میں ممکن ہے جب فلسطینی عوام کے حقوق تسلیم کیے جائیں۔
