تل ابیب میں نیتن یاہو کے خلاف مظاہرہ
صیہونیوں نے ایک بار پھر تل ابیب میں صیہونی وزیر اعظم نیتن یاہو کی پالیسیوں کے خلاف مظاہرہ کرکے جنگ بند کرنے اور قیدیوں کے ہمہ گیر تبادلہ کے معاہدہ کا مطالبہ کیا
سحر نیوز/ عالم اسلام: صیہونیوں نے ایک بار پھر تل ابیب میں مظاہرہ کر کے غاصب صیہونی حکومت کے وزیر اعظم نیتن یاہو کی پالیسیوں کے خلاف احتجاج اور جنگ بندی نیز قیدیوں کے تبادلے کے ہمہ گیر معاہدے پر دستخط کا مطالبہ کیا۔ دوسری طرف اپوزیشن صیہونی لیڈر یائیر لاپید نے مطالبہ کیا ہے کہ نیتن یاہو کے اس ہفتے کے وائٹ ہاؤس کے دورے کا مقصد، قیدیوں کی واپسی ہونا چاہئے۔ اس سلسلے ميں صیہونی جنگی قیدیوں کے لواحقین نے کہا ہے کہ ضروری ہے کہ ہماری اولادیں اپنے گھر واپس آئیں اور نیتن یاہو عہدہ چھوڑ کر اپنے گھر جائیں۔ صیہونی جنگی قیدیوں کے لواحقین نے کہا ہے کہ ہم ٹرمپ سے یہ کہنا چاہتے ہیں کہ جب نیتن یاہو تم سے یہ کہتے ہیں کہ ہم فوجی دباؤ سے اپنے قیدیوں کو آزاد کرائيں گے، تو جھوٹ بولتے ہیں ، کیونکہ جنگی قیدیوں کی واپسی جنگ کے خاتمے سے ہی ممکن تھی لیکن نیتن یاہو نے اپنے ذاتی مفاد کو ترجیح دی اور سمجھوتے کے دوسرے مرحلے کو سبوتاژ کردیا جس میں ہمارے سبھی بیٹے آزاد ہونے والے تھے۔
