غزہ میں صیہونی حکومت کی درندگی کا دائرہ روز بڑھتا جا رہا ہے؛ عبدالملک الحوثی
عبدالملک الحوثی نے کہا کہ اسرائیل صرف غزہ میں قتل و غارت گری نہیں کر رہا بلکہ مسجد الاقصی اور بیت المقدس کو بھی جارحیت کا نشانہ بنا رہا ہے۔
سحرنیوز/عالم اسلام: انصاراللہ یمن کے سربراہ عبدالملک الحوثی نے کہا ہے کہ اسرائیل نے گزشتہ ہفتے غزہ میں بدترین مظالم ڈھائے ہیں، جن میں شدید بمباری، بے گھر لوگوں کے خیموں پر حملے اور غذائی محاصرہ شامل ہیں۔ انہوں نے کہا کہ صرف رواں ہفتے میں صہیونی حملوں اور قحطی کے نتیجے میں سینکڑوں فلسطینی شہید اور ہزاروں زخمی ہوئے ہیں۔ ڈھائی لاکھ سے زائد بچے شدید غذائی قلت کے باعث موت کے خطرے سے دوچار ہیں، جو ایک انسانی المیہ ہے۔ صہیونی وحشیوں نے اس فلسطینی بچی آمنہ المفتی کو بھی شہید کردیا جو پانی کا گیلن اٹھائے ہوئے صہیونی میزائل کا نشانہ بنی۔
انہوں نے کہا کہ اسرائیل غرب اردن کو تقسیم کرکے بیت المقدس کو مکمل طور پر الگ کرنے اور فلسطین کے وجود کو ختم کرنے پر تلا ہوا ہے۔ صہیونی افواج مسجد الاقصی کی حرمت پامال کر رہی ہیں اور اس کے انہدام کی سازش کرکے وہاں ہیکل کی تعمیر کرنا چاہتی ہیں۔ اسرائیل اپنے عزائم کو مغربی دنیا کی حمایت سے آگے بڑھا رہا ہے اور گریٹر اسرائیل کے قیام کے خواب کو پورا کرنے کی کوشش میں ہے۔
عبدالملک الحوثی نے بتایا کہ یمنی مسلح افواج نے اس ہفتے بحیرہ احمر میں دو اسرائیلی جہازوں کو نشانہ بنایا۔ صرف ماہ صفر میں یمن نے 42 ہائپرسونک میزائل، ڈرون اور جدید ہتھیار استعمال کرتے ہوئے اسرائیلی اہداف کو نشانہ بنایا۔ ان حملوں کی وجہ سے اسرائیلی بندرگاہ ایلات مفلوج ہوچکی ہے اور محاصرہ باب المندب اور خلیج عدن تک پھیل گیا ہے۔
