پاکستان تحریک انصاف کی الیکشن ریلی ملتوی، زبردست لاٹھی چارج اور شیلنگ
حماد اظہر نے کہا کہ کارکن کسی صورت مشتعل نہ ہوں، یہ لوگ ملک میں خون چاہتے ہیں، کارکن پُرامن طریقے سے پیچھے ہٹ جائیں، ہم کسی صورت خون خرابہ نہیں چاہتے۔
سحر نیوز/ پاکستان: پی ٹی آئی رہنما حماد اظہر نے میڈیا سے گفتگو کرتے ہوئے کہا کہ پُرامن ریلی پر حکومت نے تشدد کرایا، رات کے وقت پورا سکیورٹی پلان کلیئر ہوا تھا، پُرامن الیکشن ریلی نکالنا ہمارا حق ہے، پولیس نےشہریوں کی گاڑیوں کو توڑا، ان کا سانحہ ماڈل ٹاؤن کا پورا ارادہ تھا۔
انہوں نے کہا کہ 100 کارکن گرفتار ہیں، یہ فاشزم نہیں تو اور کیا ہے،عمران خان نے اعلیٰ عدلیہ سے انسانی حقوق کی خلاف ورزیوں پر نوٹس لینے کا کہا ہے۔
حماد اظہر نے کہا کہ مسلم لیگ (ن) کے لوگ گلی، محلوں میں نہیں جا سکتے، یہ چاہتے ہیں ملک میں افراتفری پھیلے، عمران خان کی ساری جدوجہد آئین و قانون کے دائرے میں ہے، آج پی ڈی ایم ، نگران حکومت نے انتہا کر دی۔
انہوں نے کہا کہ ہمارے وکلا نگران حکومت پر توہین عدالت کا مقدمہ دائر کریں گے، نگران حکومت کا مقصد تو الیکشن کرانا تھا، جمہوریت کے لبادے میں فاشزم ہے، رانا ثنا اللہ چاہتے ہیں لاشیں گریں، ہم ملک میں خون خرابہ نہیں ہونے دیں گے۔
حماد اظہر کا کہنا تھا کہ خواتین، بچوں پر حملہ کیا گیا، کئی کارکن زخمی ہوئے اور ایک سو سے زائد کو گرفتار کر لیا گیا۔ جبکہ پی ٹی آئی ذرائع کا کہنا ہے کہ ایک کارکن جاں بحق بھی ہوا ہے۔
