پارلیمنٹ سے گرفتاریوں پر 5 سکیورٹی اہل کار معطل، ایجنسیوں کے ڈی جیز کے خلاف کارروائی ہونی چاہیے:عمرایوب
پارلیمنٹ سے ہونے والی گرفتاریوں پر قومی اسمبلی کے سارجنٹ ایٹ آرمز سمیت 5 سکیورٹی اہل کاروں کو معطل کردیا گیا۔
سحر نیوز/ پاکستان: پارلیمنٹ کے اندر سے ہونے والے گرفتاریوں کے معاملے پر اسپیکر قومی اسمبلی ایاز صادق کی جانب سے ایکشن لیے جانے کے بعد اسمبلی کی سکیورٹی میں غیر ذمے داری برتنے پر سارجنٹ ایٹ آرمز اشفاق اشرف کو معطل کردیا گیا۔
اسپیکر قومی اسمبلی ایاز صادق نے سارجنٹ ایٹ آرمز کو 4 ماہ کے لیے معطل کیا ہے۔ اس کے علاوہ پارلیمنٹ میں سکیورٹی میں ناکامی پر دیگر 4 سکیورٹی اہلکاروں کو بھی معطل کردیا گیا ہے۔
اسپیکر ایاز صادق کی زیر صدارت اسمبلی اجلاس میں پی پی پی، جے یو آئی ، پی ٹی آئی اور ایم کیو ایم سمیت دیگر حکومتی و اپوزیشن جماعتوں نے واقعے کی شدید مذمت کی تھی۔
دریں اثنا آج اپنے بیان میں اپوزیشن لیڈر عمر ایوب نے کہا ہے کہ پارلیمنٹ سے لوگوں کو اٹھانے پر ایجنسیوں کے ڈی جیز کے خلاف کارروائی ہونی چاہیے۔ انہوں نے کہا کہ پارلیمنٹ سے کس نے لوگوں کو اٹھایا، یہ کوئی خلائی مخلوق تھی، دلیرانہ انداز میں لوگوں کو جبری طور پر گمشدہ کیا۔ جمہوریت میں یہ چیز نہیں چل سکتی ۔ بس ہوگئی ہے، اب ایجنسیز کے ڈی جیز کے خلاف کارروائی ہونی چاہیے اور مقدمہ درج کرکے انھیں کیفر کردار تک پہنچایا جائے۔
یاد رہے کہ گزشتہ روز قومی اسمبلی اجلاس میں ارکان نے پارلیمنٹ ہاؤس میں رات گئے پولیس کے داخل ہونے اور لائٹس بند کرکے ارکان کی گرفتاریوں کو پارلیمان پر حملہ قرار دیا تھا۔
