پاکستانی وزیر اعظم اور سعودی ولی عہد کی ملاقات کا مشترکہ اعلامیہ جاری، سرمایہ کاری اور تجارتی تعلقات میں استحکام کا فیصلہ
پاکستان کے وزیراعظم شہباز شریف اور سعودی ولی عہد محمد بن سلمان کے درمیان ہونے والی ملاقات کا مشترکہ اعلامیہ جاری کردیا گیا ہے جس میں اقتصادی تعاون کا فریم ورک شروع کرنے پر اتفاق اور سرامیہ کاری اور تجارتی تعلقات میں استحکام کا فیصلہ کیا گیا۔
سحرنیوز/پاکستان: میڈیا ذرائع کی رپورٹ کے مطابق شہباز شریف اور محمد بن سلمان کی ملاقات کے مشترکہ اعلامیے میں کہا گیا کہ دونوں ملکوں کے تعلقات میں یہ پیش رفت سعودی عرب اور پاکستان کے درمیان تقریباً 8 عشروں پر محیط تاریخی تعاون کی مضبوطی، دونوں ممالک کی قیادت کو متحد کرنے والے بھائی چارے اور اسلامی یکجہتی کے مضبوط رشتے کی عکاسی ہے۔
مشترکہ اعلامیے کے مطابق یہ فریم ورک دونوں ممالک کے مشترکہ اقتصادی مفادات پر مبنی ہے اور ان کی تکمیل کے لیے سرمایہ کاری اور تجارتی تعلقات کو مضبوط بنانے کے لئے دونوں ممالک کی باہمی خواہش کا اعادہ ہے۔
مشترکہ اعلامیے میں کہا گیا ہے کہ فریم ورک کے تحت اقتصادی، تجارتی، سرمایہ کاری اور ترقیاتی شعبوں میں کئی اسٹریٹیجک اور اہم اثرات کے حامل منصوبوں پر تبادلۂ خیال کیا جائے گا جو دونوں ممالک کے درمیان تعاون کو مضبوط بنانے، نجی شعبے کے اہم کردار کو بڑھانے اور تجارتی تبادلے کو بڑھانے میں معاون ثابت ہوں گے۔
اعلامیے میں کہا گیا کہ فریم ورک کے ترجیحی شعبوں میں توانائی، صنعت، کان کنی، اطلاعاتی ٹیکنالوجی، سیاحت، زراعت اور غذائی تحفظ شامل ہیں۔
اعلامیے میں مزید کہا گیا ہے کہ یہ فریم ورک باہمی برادرانہ تعلقات کو مضبوط بنانے کے لیے دونوں ممالک کے اقدامات کی عکاسی کرتا ہے اور اقتصادی، تجارتی اور سرمایہ کاری کے شعبوں میں پائیدار شراکت داری کی تعمیر کے لیے ان کے مشترکہ وژن کی توثیق کرتا ہے۔
