ٹیرف معاملے کو بات چیت کے ذریعے حل کریں؛ چین
چین نے ٹیرف معاملے کو بات چیت کے ذریعے حل کرنے کا مشورہ دیا ہے۔
سحرنیوز/دنیا: چین کی وزارت خارجہ کے ترجمان نے کہا ہے کہ امریکا کو چین کے خلاف تمام یکطرفہ ٹیرف اقدامات مکمل طور پر ختم اور مساوی بات چیت کے ذریعے اختلافات کو حل کرنے کا راستہ تلاش کرنا چاہیے۔ چین کی وزارت خارجہ نے کہا کہ یکطرفہ ٹیرف میں اضافہ امریکا نے شروع کیا، اگر وہ واقعی مسئلہ حل کرنا چاہتا ہے تو بین الاقوامی برادری اور ملکی اسٹیک ہولڈرز کی بات پر دھیان دینا ہوگا۔
چینی وزارت خارجہ کے ترجمان نے امریکی اور چینی حکام کے درمیان روزانہ بات چیت ہونے کے بیان کی تردید کی اور کہا کہ ٹیرف کے معاملے پر امریکا سے مذاکرات نہیں کیے۔
قابل ذکر ہے کہ گزشتہ روز امریکی صدر ٹرمپ نے کہا تھا کہ چین پر منحصر ہے کہ ٹیرف کتنی جلدی کم ہوسکتے ہیں، اگلے دو تین ہفتوں میں چین کے لیے ٹیرف طے کریں گے، چین پر عائد ٹیرف میں کمی کا انحصار چینی قیادت کےعمل پر ہو گا۔
