ٹیرف کی مخالفت کرنے والے بیوقوف ہیں: ڈونلڈ ٹرمپ
امریکی صدر ڈونلڈ ٹرمپ نے اب ٹیرف کی مخالفت کرنے والوں کو بیوقوف قرار دے دیا ہے اور کہا ہے کہ ٹیرف ان کا سب سے طاقتور معاشی ہتھیار ہے۔
سحرنیوز/دنیا: ذرائع ابلاغ کی رپورٹ کے مطابق امریکی صدر ڈونلڈ ٹرمپ نے اپنی ٹیرف پالیسی کو ایک بار پھر درست قرار دیتے ہوئے ٹیرف کی مخالفت کرنے والوں کو بیوقوف کہہ دیا ہے۔ انہوں نے کہا کہ جلد ہی ہر امریکی شہری کو (امیروں کے علاوہ) 2,000 ڈالر کی ادائیگی کی جائے گی۔ یہ رقم ان کی انتظامیہ کے ذریعہ وصول کئے گئے ٹیرف ریونیو سے دی جائے گی۔
ٹرمپ نے اپنے سوشل میڈیا پلیٹ فارم’ ٹروتھ سوشل‘ پر لکھا کہ جو لوگ ٹیرف کی مخالفت کرتے ہیں وہ بیوقوف ہیں۔ انہوں نے دعویٰ کیا کہ ان کے دور اقتدار میں امریکہ دنیا کا سب سے امیر اور معزز ملک بن گیا جہاں افراط زر کی شرح بہت کم اوراسٹاک مارکیٹ میں ریکارڈ اضافہ ہوا ہے۔
صدر ٹرمپ نے یہ بھی کہا کہ امریکہ ٹیرف سے کھربوں ڈالر کما رہا ہے، جو نہ صرف 37 ٹریلین ڈالر کے قومی قرضے کو کم کرنے کے لیے استعمال کیا جائے گا بلکہ، اسے عام شہریوں میں ڈیویڈینڈ کے طور پر بھی تقسیم کیا جائے گا۔ ان کے مطابق ہر امریکی کو (زیادہ آمدنی والے گروپوں کے علاوہ) جلد ہی کم از کم 2,000 ڈالرملیں گے۔
انہوں نے اپنی پوسٹ میں لکھا کہ ریٹائرمنٹ بچت اب تک کی بلند ترین سطح پر ہے۔ پورے ملک میں نئے پلانٹ اور کارخانے قائم کئے جا رہے ہیں البتہ ڈونلڈ ٹرمپ نے اس منصوبے کے نفاذ، عمل درآمد یا ٹائم لائن کے بارے میں کوئی واضح معلومات فراہم نہیں کیں۔
قابل ذکر ہے کہ امریکی سپریم کورٹ اس بات کی تحقیقات کر رہا ہے کہ آیا ٹرمپ نے حد سے زیادہ وسیع ٹیرف لگا کر اپنے اختیارات کا غلط استعمال کیا ہے؟
ڈونلڈ ٹرمپ نے عدالتی تحقیقات کو مکمل طور پر بے بنیاد قرار دیا ہے اور کہا ہے کہ ٹیرف ان کا سب سے طاقتور معاشی ہتھیار ہے۔ ٹرمپ نے کہا کہ ہم کھربوں ڈالر کما رہے ہیں، یہ پالیسی امریکہ کو مضبوط، خوش حال اور خود انحصار بنا رہی ہے۔
