ہندوستان: کیجریوال کو 6 دن کی ای ڈی کی حراست میں بھیج دیا گیا، عہدے پر رہتے ہوئے گرفتار ہونے والے پہلے وزیر اعلیٰ
دہلی کے وزیر اعلیٰ اروند کیجریوال کو دہلی کی ایک عدالت نے 28 مارچ تک یعنی 6 دن کی ای ڈی کی حراست میں بھیج دیا ہے۔
سحرنیوز/ ہندوستان: میڈیا ذرائع کے مطابق دہلی کے وزیر اعلیٰ اروند کیجریوال کو آج، جمعہ کو، ای ڈی نے دہلی کی راؤز ایونیوعدالت میں پیش کیا۔ عدالت نے اروند کیجریوال کو 28 مارچ تک ای ڈی، انفورسمنٹ ڈائریکٹوریٹ، کی حراست میں بھیج دیا۔ ای ڈی نے عدالت سے 10 دن کے ریمانڈ کی درخواست کی تھی۔
ای ڈی، انفورسمنٹ ڈائریکٹوریٹ، نے اروند کیجریوال کو مبینہ دہلی شراب اسکینڈل کیس میں فنانسنگ ٹریل کے سلسلے میں گرفتار کیا ہے۔ ان کے خلاف منی لانڈرنگ ایکٹ کے تحت مقدمہ درج کیا گیا ہے۔
ای ڈی نے عدالت کو بتایا کہ 9 سمن بھیجنے کے باوجود وزیر اعلیٰ نے تحقیقات میں تعاون نہیں کیا۔ یہی وجہ ہے کہ انہیں حراست میں لے کر پوچھ گچھ کرنے کی ضرورت ہے۔ عدالت کو بتایا گیا کہ گوا انتخابات کی فنڈنگ کے سلسلے میں دہلی کی شراب پالیسی میں تبدیلیاں کی گئیں۔ کہا گیا کہ دہلی حکومت ایک کمپنی کی طرح کام کر رہی ہے۔ اسی پالیسی کے ذریعہ گوا انتخابات کے لیے رقم کا بندوبست کیا گیا تھا۔
واضح رہے کہ دہلی کے وزیر اعلیٰ اروند کیجریوال کو گزشتہ روز رات کو ان کے گھر سے گرفتار کیا گیا تھا۔ گرفتاری سے پہلے ای ڈی نے کیجریوال سے لمبی پوچھ گچھ کی اور ان کے گھر کی تلاشی لی۔ کیجریوال اور ان کے اہل خانہ کے فون بھی ای ڈی نے ضبط کرلئے تھے۔
قابل ذکر ہے کہ اروند کیجریوال آزاد ہندوستان کے پہلے وزیر اعلیٰ ہیں جنہیں عہدے پر رہتے ہوئے گرفتار کیا گیا ہے۔
