بی جے پی کتنے ہی جھوٹ بولے یا سازشیں رچے، ہم پسماندہ طبقات کو حق دلانے کے لیے پرعزم: راہل گاندھی
راہل گاندھی نے بی جے پی پر حملہ کرتے ہوئے کہا کہ کانگریس پسماندہ، دلت، قبائلی اور اقلیتی طبقات کو ان کا حق دلانے کے لیے پرعزم ہے۔ انہوں نے تعلیم اور ریزرویشن پر خصوصی زور دیا ہے۔
سحرنیوز/ہندوستان: کانگریس کے سینئر رہنما اور لوک سبھا میں اپوزیشن لیڈر راہل گاندھی نے بدھ کو ایکس پر بی جے پی کو نشانہ بناتے ہوئے کہا کہ چاہے بی جے پی کتنے ہی جھوٹ بولے یا سازشیں رچے، ہم پسماندہ طبقات کو ان کا پورا حق دلانے کے لیے پرعزم ہیں۔ ان کا کہنا تھا کہ پارٹی کی جدوجہد محض سیاسی نہیں بلکہ سماجی انصاف کی اصل لڑائی ہے جس میں دلت، آدیواسی، اقلیتی اور پسماندہ سماج کو عزت اور برابر کے حقوق دلانا بنیادی مقصد ہے۔
راہل گاندھی نے اپنی پوسٹ میں زور دیا کہ سب سے اہم میدان تعلیم ہے، کیونکہ یہی محروم طبقات کی ترقی کا سب سے بڑا ذریعہ ہے۔ انہوں نے کہا کہ کانگریس اس بات کو یقینی بنائے گی کہ ان طبقات کو تعلیم تک مساوی رسائی ملے اور اسی لیے ’اتی پچھڑا نیائے سنکلپ‘ میں خصوصی اقدامات شامل کیے گئے ہیں۔ انہوں نے وعدہ کیا کہ اب نہ صرف سرکاری اداروں میں بلکہ نجی کالج اور یونیورسٹیوں میں بھی ریزرویشن نافذ کیا جائے گا تاکہ محروم طبقے کے نوجوانوں کو اعلیٰ تعلیم کے مواقع میسر ہو سکیں۔
ہندوستان کے اپوزیشن لیڈر نے مزید کہا کہ نجی اسکولوں میں تعلیم کے حق کے تحت جو نشستیں ریزرو ہوتی ہیں، ان میں سے آدھی سیٹیں دلت، آدیواسی، پسماندہ اور انتہائی پسماندہ طبقات کے بچوں کے لیے مخصوص ہوں گی۔ راہل گاندھی نے یہ بھی واضح کیا کہ بی جے پی کی تمام تر سازشوں اور جھوٹے بیانیوں کے باوجود کانگریس اپنے مقصد سے پیچھے ہٹنے والی نہیں ہے۔ انہوں نے کہا کہ سماجی انصاف اور مساوات کے اس ایجنڈے کو ہم کسی بھی قیمت پر نافذ کریں گے کیونکہ یہی ملک کے آئین کی روح ہے اور یہی جمہوریت کا اصل چہرہ ہے۔
