ہندوستان: پلاسٹک کی خالی بوتلیں لاؤ، مُفت دوا لے جاؤ
ہندوستان کے اقتصادی مرکز ممبئی میں ایک رفاہی تنظیم کی طرف سے پلاسٹک کی خالی بوتلوں کے عوض غریبوں کو مفت دوا دینے کی مہم چلائی جا رہی ہے۔
سحرنیوز/ہندوستان: ہندوستانی میڈیا رپورٹوں کے مطابق ریاست مہاراشٹر کے دارالحکومت ممبئی میں واقع ایک رفاہی تنظیم "مالونی ہیلتھ کیئراینڈ پبلک سروس سینٹر" کی جانب سے پلاسٹک کی خالی بوتلوں کو جمع کرنے اور انہیں فروخت کرکے غریب شہریوں کو معمولی فیس پر یا بہت سے مریضوں کو مفت دوا فراہم کرانے کا ایک منفرد قدم اٹھایا گیا ہے۔
مذکورہ این جی او نے اس منفرد اقدام کے ذریعہ غریبوں کو دوا دینے، آلودگی ختم کرنے اور نشے کی لعنت کے خاتمے پر توجہ مرکوز کی ہے۔
مذکورہ سینٹر نے مالونی (مہاڈا) میں اپنے کلینک کے باہر پلاسٹک کی بوتلوں کا ری سائیکل باکس نصب کیا ہے۔ لوگوں کو پلاسٹک کی خالی بوتلوں کو سڑکوں پر پھینکنے کے بجائے اس باکس میں ڈالنے کی ترغیب دی جاتی ہے۔ اس کے بعد وقفے وقفے سے اسے کھولا جاتا ہے اور اس سے ماہانہ 400 سے 800 روپے جمع ہوتے ہیں۔
جمع شدہ رقم سے غریب شہریوں کو بخار، بدن درد، کھانسی، نزلہ اور سر درد جیسی بیماریوں کے لئے معمولی فیس پر اور بہت سے مریضوں کو مفت دوائیں فراہم کرائی جاتی ہیں۔
مالونی ہیلتھ کیئر اینڈ پبلک سروس سینٹر کے بانی حسین شیخ، جو خود ایک اسپتال سے وابستہ ہیں، ایک گفتگو کے دوران مذکورہ تفصیلات کے ساتھ یہ بھی بتایاکہ "طبی لائن سے جُڑنے کے سبب یہ انداز ہ ہواکہ غریبوں کے لئے چھوٹا موٹا علاج بھی مشکل ہے، اس لئے ایک سال قبل چند ساتھیوں اور کچھ تنظیموں کے ساتھ مل کر اس کا آغاز کیا گیا اور مالونی مہاڈا میں اپنے میڈیکل سینٹر کے قریب ایک ’باکس‘ لگایا اور لوگوں سے درخواست کی کہ وہ پلاسٹک کی بوتلیں ادھر ادھر نہ پھینکیں بلکہ باکس میں ڈالیں۔"
ہمیں فالو کریں:
Follow us: Facebook, X, instagram, tiktok
انہوں نے یہ بھی بتایاکہ یہ تجربہ کامیاب رہا، اسی بنیاد پرمذکورہ سینٹرکی جانب سے 30 نومبر اتوار کو دوپہر ایک بجے سے تین بجے تک ایک عوامی بیداری نشست کا انعقاد کیا گیا اور اس میں مختلف شعبوں کے لوگوں کو مدعو کیا گیا تاکہ اس طرح کے باکس مالونی کے الگ الگ حصوں میں لگائے جائیں اور زیادہ سے زیادہ غریبوں کا علاج ہو۔
