ہندوستان: سونیا گاندھی، راہل گاندھی اور دیگر کانگریسی رہنماؤں کے خلاف نیا مقدمہ
دہلی پولیس نے انفورسمنٹ ڈائریکٹوریٹ (ای ڈی) کی شکایت کی بنیاد پر سونیا گاندھی، راہل گاندھی اور دیگر کانگریسی رہنماؤں کے خلاف نیشنل ہیرالڈ معاملے میں ایک نیا کیس درج کیا ہے۔
سحرنیوز/ہندوستان: تفصیلات کے مطابق دہلی پولیس کی اقتصادی جرائم کی روک تھام سے متعلق شاخ (ای او ڈبلیو) نے یہ مقدمہ منی لانڈرنگ کی روک تھام سے متعلق قانون کے تحت جاری تحقیقات کے نتیجے میں درج کیا ہے۔
ای ڈی کے مطابق ملزمین، خاص طور پر کمپنی ’ینگ انڈین‘پر الزام ہے کہ اس نے ایک مجرمانہ سازش کے تحت ایسوسی ایٹڈ جرنلز لمیٹڈ کے دو ہزار کروڑ روپے سے زیادہ مالیت کے اثاثوں کو محض پچاس لاکھ روپے میں اپنے قبضے میں لیا۔
ای ڈی کا دعویٰ ہے کہ ینگ انڈین میں سونیا گاندھی اور راہل گاندھی کی مجموعی حصے داری 76 فی صد ہے، اس لیے اس مبینہ اسکیم سے بنیادی فائدہ اٹھانے والے بھی وہی ہیں۔
ای ڈی کا الزام ہے کہ سال دوہزار دس میں کانگریس پارٹی نے اے جے ایل پر واجب الادا نوّے کروڑ روپے سے زائد کے قرض کی وصولی کا حق صرف پچاس لاکھ روپے میں ینگ انڈین کو منتقل کردیا۔ بعد ازاں اے جے ایل نے اسی واجب الادا رقم کو ایکویٹی میں تبدیل کرکے ینگ انڈین کو نو کروڑ سے زیادہ شیئر جاری کیے، جس سے کمپنی (ینگ انڈین )کو اے جے ایل کے تقریباً تمام اثاثوں کے مالکانہ حقوق مل گئے۔
ہمیں فالو کریں:
Follow us: Facebook, X, instagram, tiktok
قابل ذکر ہے کہ یہ معاملہ شروع میں دوہزارتیرہ میں بی جے پی لیڈر سبرامنیم سوامی کی طرف سے دائر نجی شکایت سے شروع ہوا تھا، جس پر دوہزارچودہ میں عدالت نے کارروائی آگے بڑھائی۔ بعد ازاں دہلی ہائی کورٹ اور سپریم کورٹ نے بھی اس قانونی کارروائی کو برقرار رکھا۔ اب ای ڈی کی جانب سے اپنی تفتیشی رپورٹ دہلی پولیس کی ایک شاخ ای او ڈبلیو کو پیش کئے جانے کے بعد اس معاملے میں ایف آئی آر درج کرائی گئی ہے۔
