ہندوستان: کانگریس نے منريگا بچاؤ سنگرام کے تحت حکومت کے سامنے تین اہم مطالبات پیش کر دیئے

Jan ۰۴, ۲۰۲۶ ۱۷:۵۲ Asia/Tehran

ہندوستان کی حزب اختلاف کی سب سے بڑی پارٹی کانگریس کے صدر ملکارجن کھڑگے نےکہا ہے کہ پارٹی نے منریگا بچاؤ سنگرام کے تحت تین اہم مطالبات حکومت کے سامنے رکھے ہیں۔

سحرنیوز/ہندوستان: اطلاعات کے مطابق ملکارجن کھڑگے نےکہا کہ ہمارے تین مطالبات یہ ہیں کہ منریگا کی جگہ لایا جانے والا وی بی جی رام جی قانون واپس لیا جائے، منریگا کو مزدور اور غریب طبقات کے حقوق پر مبنی قانون کے طور پر بحال کیاجائے اور عوام کے کام کے حق اور پنچایتوں کے حق کو بحال کیا جائے۔ ملکارجن کھڑگے نے کہا کہ ہم نے منریگا بچاؤ سنگرام اس لئے شروع کیا ہے کہ منریگا کوئی عطیہ نہیں بلکہ یہ حق اور اس کی قانونی گارنٹی ہے۔

انھوں نے کہا کہ منریگا سے کروڑوں غریبوں کو اپنے گاؤں میں کام ملا، جس سے مجبوری کی مہاجرت کم ہوئی، دیہی مزدوری بڑھی اور خواتین کا معاشی وقار مضبوط ہوا۔

نئی دہلی سے موصولہ رپورٹ کے مطابق کانگریس پارٹی نے منریگا بچانے اور اس کی جگہ پارلیمنٹ کے پاس کردہ نئے جی رام جی قانون کی مخالفت میں اپنی مہم تیز کردی ہے۔

سینیئر کانگریسی رہنما جے رام رمیش نے گزشتہ روز نئی دہلی میں ایک پریس کانفرنس میں اعلان کیا تھا کہ ملک گیر منریگا بچاؤ سنگرام آٹھ جنوری سے شروع ہوگا اور پچیس فروری تک جاری رہے گا۔ انھوں نے کہا کہ کانگریس پارٹی کا یہ سنگرام صرف دہلی تک محدود نہیں رہے گا بلکہ پورے ملک میں، ملک کی ہر ریاست میں، ضلع، بلاک اورگرام پنچایت کی سطح پر چلایا جائے گا۔

ہمیں فالو کریں:

یاد رہے کہ ہندوستان کی مرکزی حکومت نے دو ہزار پانچ میں مہاتما گاندھی کے نام سے پاس ہونے والے اس قانون کو ختم کرکے اس کی جگہ نیا دیہی روزگار قانون پاس کیا ہے جس کی حزب اختلاف کی سبھی جماعتوں نے سخت مخالفت کی تھی لیکن پارلیمنٹ میں بی جے پی کی قیادت میں حکمراں اتحاد کو واضح اکثریت حاصل ہے اس لئے دونوں ایوانوں سے نیا بل پاس ہوگیا جس پر صدر ہندوستان نے دستخط بھی کردیئے جس کے بعد وہ قانون میں تبدیل ہوگیا۔