مسلم ممالک صہیونی جرائم اور اسلامی ممالک کے خلاف امریکی جارحیت کی روک تھام کے لئے موثر اقدامات انجام دیں: ایرانی وزارت خارجہ
ایرانی وزارت خارجہ کے ترجمان نے کہا ہے کہ صہیونی حکومت کے جرائم اور اسلامی ممالک کے خلاف امریکی جارحیت کو روکنے کے لیے مسلم ممالک کو بھرپور اور مؤثر اقدامات کرنے ہوں گے۔
سحرنیوز/ایران: ایرانی وزارت خارجہ کے ترجمان نے اسماعیل بقائی نےکہا ہے کہ صہیونی حکومت کے جرائم اور اسلامی ممالک کے خلاف امریکی جارحیت کو روکنے کے لیے مسلم ممالک کو بھرپور اور مؤثر اقدامات کرنے ہوں گے۔ ایرانی وزارت خارجہ کے ترجمان اسماعیل بقائی نے یمن میں امریکی فوجی حملوں کے نتیجے میں بے گناہ شہریوں کی شہادت اور بنیادی انفراسٹرکچر کی تباہی پر گہرے رنج و غم کا اظہار کرتے ہوئے ان حملوں کو کھلی جارحیت اور جنگی جرائم سے تعبیر کیا اور ان کی شدید مذمت کی ہے۔ انہوں نے اقوام متحدہ کی سلامتی کونسل اور دیگر بین الاقوامی اداروں کی خاموشی کو بھی شرمناک اور ناقابل قبول قرار دیا۔
ایران کے دفتر حارجہ کے ترجمان اسماعیل بقائي نے غزہ میں صہیونی حکومت کے حالیہ حملوں میں سینکڑوں فلسطینی خواتین اور بچوں کے قتلِ عام کی مذمت کرتے ہوئے کہا کہ جو ممالک اسرائیل کو فوجی، مالی اور سیاسی مدد فراہم کر رہے ہیں، وہ ان جرائم میں برابر کے شریک ہیں۔ اسماعیل بقائی نے اس بات پر زور دیا کہ یمن پر امریکی حملوں اور غزہ میں جاری نسل کشی کے درمیان ہم آہنگی اس بات کا ثبوت ہے کہ امریکہ اور اسرائیل نے امت مسلمہ کو کمزور کرنے اور فلسطینی عوام کی حمایت کو ختم کرنے کے لیے مشترکہ سازش تیار کر رکھی ہے۔ انہوں نے اسلامی ممالک پر زور دیا کہ وہ صیہونی مظالم اور امریکی جارحیت کو روکنے کے لیے عملی اور فوری اقدامات کریں اور اسلامی تعاون تنظیم کو اس مسئلے کے حل کے لیے سنجیدہ کوششیں کرنے پر مجبور کریں۔
