ایران اور روس کے درمیان جامع اسٹریٹجک شراکت داری کے معاہدے ڈوما میں منظور
روسی پارلیمنٹ ڈوما نے ماسکو اور تہران کے درمیان جامع اسٹریٹجک پارٹنرشپ معاہدے کی منظوری دے دی۔
موصولہ اطلاعات کے مطابق، روسی پارلیمنٹ ڈوما کے نمائندوں نے آج متفقہ طور پر روس اور ایران کے درمیان جامع اسٹریٹجک پارٹنرشپ معاہدے کی منظوری دے دی۔ اس معاہدے پر 17 جنوری کو ایرانی صدرڈاکٹر مسعود پزشکیان کے دورہ ماسکو اور ان کے روسی ہم منصب ولادیمیر پوتین کے ساتھ ملاقات کے دوران دستخط کئے گئے تھے۔
معاہدے کی بنیاد پر فریقین تمام شعبوں میں اپنے تعلقات کو وسعت دیں گے اور خصوصی طور پر دفاعی شعبوں میں تعاون کو مضبوط بنانے کے ساتھ علاقائی اور عالمی امور میں مشترکہ موقف اختیار کریں گے۔
مذکورہ معاہدے میں معیشت، نقل و حمل، راہداری، ٹرانزٹ، بینکنگ، سرمایہ کاری، اور تیل اور گیس کے مختلف شعبوں میں 30 سے زیادہ شقیں شامل ہیں۔
یہ ایک طویل المدتی اسٹریٹیجک معاہدہ ہے جس میں 47 مفاہمتی دستاویزات شامل ہیں، جن کا مسودہ ایران نے تیار کیا تھا اور اس سال کے موسم گرما میں اسے حتمی شکل دی گئی تھی۔
