جنگ بندی کے باوجود غاصب اسرائیلی فوج کی جارحیت جاری: ایرانی وزارت خارجہ
اسلامی جمہوریہ ایران کی وزارت خارجہ کے ترجمان اسماعیل بقائی نے کہا ہے کہ جنگ بندی کے اعلان کے باوجود غاصب اسرائیلی فوج کی جارحیت کا سلسلہ جاری ہے جو تشویشناک ہے۔
سحرنیوز/ایران: ارنا کی رپورٹ کے مطابق اسلامی جمہوریہ ایران کی وزارت خارجہ کے ترجمان اسماعیل بقائی نے گزشتہ رات کہا کہ گزشتہ چوبیس گھنٹے کے دوران غزہ پٹی میں غاصب صیہونی حکومت کی فوجی جارحیت کا سلسلہ بند نہیں ہوا۔ ان کا کہنا تھا کہ غزہ پٹی میں ہونے والی تازہ صیہونی جارحیت میں کم از کم 10 فلسطینی شہید اور زخمی ہوئے ہیں۔
اسماعلیل بقائی نے کہا کہ دوسری جانب غاصب اسرائیلی آبادکاروں نے غرب اردن میں زیتون کے باغات کو بھاری نقصان پہنچایا ہے۔ صیہونی فوج نے فلسطینیوں کی رہائشی عمارتوں میں آگ لگادی اور مسجد الاقصی کے تقدس کو پامال کیا۔
ایرانی وزارت خارجہ کے ترجمان نے غاصب اسرائیل کے ان کارروائیوں کی مذمت کرتے ہوئے مطالبہ کیا کہ جنگ بندی کی ضمانت دینے والوں اور صیہونی حکومت کو جوابدہ بنایا جائے۔
اسماعیل بقائی نے بدعہدی اور معاہدوں کی خلاف ورزی پر مبنی غاصب صیہونی حکومت کی ماہیت پر شدید تشویش کا اظہار کیا اور کہا کہ ان مجرمانہ کارروائیوں اور جنگ بندی کی ضمانت دینے والوں کی بے عملی کا خمیازہ ہمیشہ فلسطینی عوام کو ہی بھگتنا پڑا ہے۔
