ایٹمی تنصیبات پہلے سے کہیں زیادہ عزم و ارادے کے ساتھ بنائیں گے: صدر مملکت پزشکیان
اسلامی جمہوریہ ایران کے صدر ڈاکٹر مسعود پزشکیان نے کہا ہے کہ ہم ایٹمی تنیصبات پہلے سے کہیں زیادہ عزم و ارادے کے ساتھ بنائیں گے۔ صدر مملکت نے یہ بات ملک کی ایٹمی صنعت کے اعلیٰ عہدے داروں سے ملاقات کے دوران کہی۔
سحرنیوز/ایران: ہمارے نمائندے کی رپورٹ کے مطابق صدر مملکت ڈاکٹر مسعود پزشکیان نے ملک کے ایٹمی توانائی کے ادارے کے ہیڈکوارٹر کا آج معائنہ کیا اور ایٹمی صنعت کے اعلیٰ عہدے داروں سے ملاقات کی۔ اس ملاقات میں ڈاکٹر پزشکیان نے کہا کہ ہماری ایٹمی صنعت عوام کے مسائل کو حل کرنے اور شہری استعمال کے لئے ہے۔
صدر مملکت نے کہا کہ دشمن یہ ظاہر کرنا چاہتے ہیں کہ ایران ایٹم بم بنا رہا ہے لیکن رہبر انقلاب اسلامی کے فتوے کے مطابق ہم ایٹمی ہتھیار بنانے کو حرام سمجھتے ہیں۔ انہوں نے ایران کے ایٹمی توانائی ادارے کے ہیڈکوارٹر کا معائنہ کرتے وقت کہا کہ ہمارے سائنس دانوں کے ذہن علم سے مالامال ہیں لہذا عمارتوں اور فیکٹریوں کو ختم کرکے ہمیں ایٹمی سائنس سے محروم نہیں کیا جاسکتا۔
ڈاکٹر مسعود پزشکیان نے زور دیکر کہا کہ ہم ایک بار پھر اور پہلے سے کہیں زیادہ عزم و ارادے کے ساتھ اپنے ایٹمی مراکز کی تعمیر کریں گے۔
اس موقع پر نائب صدر اور ایٹمی توانائی کے قومی ادارے کے سربراہ محمد اسلامی نے صدر مملکت کو ایٹمی شعبے میں ترقی اور اس بارے میں تازہ ترین صورت حال پر مبنی رپورٹ پیش کی۔
