SAHAR

شام کے صوبۂ قنیطرہ کے ایک شہر پر غاصب اسرائیلی فوج کے ڈرون حملے کی خبر ملی ہے جس میں کم از کم چار افراد شہید ہو گئے ہیں۔

سحر نیوز/ عالم اسلام: المیادین ٹی وی چینل کی رپورٹ کے مطابق شام کے صوبۂ القنیطرہ میں واقع البعث شہر میں یہ حملہ ہوا ہے۔ رپورٹ کے مطابق البعث شہر میں غاصب اسرائیلی فوج نے ایک کار پر ڈرون حملہ کیا۔

اس رپورٹ کے مطابق اسرائیلی ڈرون حملے میں ایک کار پر 2 میزائل داغے گئے جس کے نتیجے میں کم از کم 4 افراد شہید ہو گئے۔

چند دن پہلے بھی غاصب صیہونی فوج نے مقبوضہ جولان  کے علاقے سے فضائی حملہ کیا اور دمشق شہر کے اطراف کے بعض علاقوں کو نشانہ بنایا تھا۔

اس حملے میں شام کے فضائی دفاعی نظام نے صیہونی حکومت کے بیشتر میزائلوں کو تباہ کرنے میں کامیابی حاصل کی اور ان میں سے بعض میزائلوں کے پھٹنے سے مالی نقصان ہوا۔