غزہ کے عوام میں خوشی کی لہر دوڑ گئی، فلسطینیوں نے 6 مہینے کے بعد جشن منایا (ویڈیو+تصاویر)
غاصب اسرائیل پر ایران کے تابڑ توڑ میزائل اور ڈرون حملوں سے پوری دنیا خاص طور سے غزہ کے عوام میں خوشی کی لہر دوڑ گئی۔
سحر نیوز/ عالم اسلام: اسلامی جمہوریہ ایران کے اسرائیل پر میزائل اور ڈرون حملوں پر غزہ کے مظلوم اور نہتے فلسطینیوں نے غزہ، رفح اور مسجد الاقصیٰ کے باہر جشن منایا، بڑی تعداد میں لوگوں نے لبیک یا اقصیٰ کے نعرے لگائے اور خوشی کا اظہار کیا ۔ جس کی ویڈیو بھی سوشل میڈیا پر وائرل ہوگئی۔
اس درمیان غزہ کے ستمدیدہ کمسن بچوں کی تصاویر بھی شوشل میڈیا پر وائرل ہوئی ہیں جن میں اسرائیل کے خلاف ایران کی تنبیہی کارروائی کے بعد انکے چہروں پر مسکراہٹ کو دیکھا جا سکتا ہے۔
فلسطینیوں خاص طور سے غزہ کے مسلمانوں کو 6 مہینے کے بعد خوشی منانے کا موقع ملا اور انہوں نے اپنی آنکھوں سے اسرائیل کے مختلف علاقوں پر ایرانی ڈرون اور میزائل حملوں کا مشاہدہ کیا۔
لبنان کے دارالحکومت بیروت کے مختلف علاقوں میں بھی سپاہ پاسداران انقلاب اسلامی کی جانب سے غاصب اور جابر صیہونی حکومت کے خلاف حملے کے بعد لبنانی عوام خوشی سے سڑکوں پر نکل آئے۔
اُدھر عراق سے بھی اطلاعات ہیں کہ ملک کے مختلف علاقوں میں لوگوں نے سڑکوں پر نکل کر اسرائیل کے خلاف ایران کی انتقامی اور تنبیہی کارروائی کا پر جوش انداز میں جشن منایا۔
سپاہ پاسداران انقلاب اسلامی کی جانب سے قدس کی غاصب اور جابر صیہونی حکومت کے خلاف شروع ہونے والے حملے کے بعد ایرانی عوام خوشی سے سڑکوں پر نکل آئے اور انقلاب اسلامی، رہبر انقلاب اور فلسطینی عوام کے حق میں نعرے لگائے۔ ایرانی عوام نے اسی طرح امریکہ مردہ باد اور اسرائیل مردہ باد کے بھی فلک شگاف نعرے لگائے۔
رات گئے ایران نے اسرائیل کے دارالحکومت تل ابیب سمیت مختلف علاقوں میزائل اور ڈرون حملوں سے نشانہ بنایا جس سے اسرائیل کی فوجی تنصیبات کو بڑا نقصان پہنچا۔
کہا جا رہا ہے کہ ایران نے 300 سے زائد ڈرون اور بیلسٹک میزائل داغے۔
واضح رہے کہ 7 اکتوبر سے جاری غزہ پر صیہونی جارحیت میں اب تک 36 ہزار کے قریب فلسطینی شہید ہوئے جن میں خواتین اور بچوں کی تعداد زیادہ ہے۔ اس یکطرفہ جنگ میں ہلاک اسرائیلیوں کی تعداد 2 ہزار سے زیادہ ہے۔
