SAHAR

اسرائیلی شہریوں نے بڑے پیمانے پر مقبوضہ فلسطین کے علاقوں میں صیہونی حکومت کے وزیر اعظم اور اس کی جنگی کابینہ کے خلاف ایک بار پھر زبردست مظاہرہ کیا ہے۔

سحر نیوز/ دنیا: تل ابیب میں صیہونی حکومت کے وزیر اعظم بنیامین نیتن یاہو کے خلاف مظاہرے میں تشدد پھوٹ پڑا اور اسرائیلی پولیس نے مظاہرین کو زد و کوب کیا۔

اسرائیل کی جنگ پسند کابینہ کی پالیسیوں کے خلاف احتجاج کرنے والوں نے تل ابیب ، مقبوضہ بیت المقدس ، اور بئرالسبع کی شاہراہیں بند کردیں۔

صیہونی کابینہ مخالف مظاہرے میں گذشتہ دنوں اور ہفتوں میں ہونے والے مظاہروں کی طرح اس مظاہرے میں بھی مظاہرین نے قیدیوں کی فوری رہائی اور حماس کے ساتھ قیدیوں کے تبادلے کے سمجھوتے پر دستخط کا مطالبہ کیا-

اسرائیلی قیدیوں کے اہل خانہ نے اس مرتبہ صیہونی وزیر جنگ یوآف گیلنٹ کے نام ایک مراسلے میں رفح پر ممکنہ حملے سمیت دیگر فوجی اقدامات پر اپنی ناراضگی کا اعلان کیا ہے-

صیہونی میڈیا نے کل ایک رپورٹ میں کہا تھا کہ گیلنٹ نے جنگی کابینہ میں نیتن یاہو سے کہا کہ وہ حماس کے ساتھ قیدیوں کے تبادلے پر رضامندی ظاہرکرے، گیلنٹ نے یہ بھی کہا کہ اسرائیلی قیدیوں کو غزہ سے واپس لانے کا ایک موقع ہے-

اسرائیلی قیدیوں کے اہل خانہ کی جانب سے مزاحمت کے ساتھ معاہدے پر رضامندی کے لیے یہ احتجاج بھی، حماس کی جانب سے جنگ بندی اور لڑائی کے خاتمے کے مجوزہ منصوبے پر رضامندی کے اعلان کے بعد سامنے آیا ہے۔