غزہ اور لبنان میں مزاحمتی محاذ کی اہمیت پر زور، یمن کی قومی سالویشن حکومت
یمن کی قومی سالویشن حکومت کے وزير اعظم نے لبنان اور غزہ میں استقامتی محاذ کی حمایت پر زور دیا ہے۔
سحرنیوز/عالم اسلام: یمن کی قومی سالویشن حکومت کے وزير اعظم احمد الرہوی نے صنعا میں المیادین ٹی سے بات کرتے ہوئے لبنان اور غزہ کے استقامتی محاذ کی مزاحمت اور پائیداری کو قابل تعریف بتایا۔ انہوں نے کہا کہ ہمارے اندر جتنی بھی توانائی ہے، اس سے غزہ اور لبنان میں استقامتی محاذ کی حمایت میں کام لیں گے۔ یمن کے وزیر اعظم نے کہا کہ ہم غزہ اور لبنان میں استقامتی محاذ کی حمایت اور مدد میں کسی بھی کوشش سے دریغ نہيں کریں گے۔ احمد الرہوی نے کہا کہ ہم اپنے لبنانی اور فلسطینی بھائيوں کے ساتھ ہیں اور اگر ہمارے درمیان جغرافیائی فاصلہ نہ ہوتا تو ایک ہی مورچے میں ہوتے۔
یمن کی قومی سالویشن حکومت کے وزیر اعظم نے کہا کہ لبنان اور فلسطین میں استقامتی محاذ کے سپاہیوں کی استقامت نے ہمارا حوصلہ بڑھا دیا ہے، ہمارے موقف کی تقویت کی ہے اور ہم ہمیشہ اپنے استقامتی محاذ کے بھائیوں کے ساتھ رہیں گے۔ یمن کی قومی حکومت کے وزیر اعظم نے یہ بیان ایسی حالت میں دیا ہے کہ غاصب صیہونی حکومت نے آج بھی دو مرحلے میں لبنان پر وسیع حملے کئے ہیں۔ گزشتہ چند روز سے جاری جنوبی لبنان پر غاصب صیہونی فوج کے وحشیانہ فضائی حملوں میں عورتوں اور بچوں سمیت سیکڑوں عام شہری شہید ہوگئے ہیں۔
