ایران کے اسپیکر قومی اسمبلی کو پاکستان کے دورے کی دعوت
پاکستانی سینیٹ کے چیرمین نے ایران کی قومی اسمبلی مجلس شورائے اسلامی کے اسپیکر محمد باقر قالیباف کو اسلام آباد کا دورے اور بین الاقوامی اسپیکرز کانفرنس کے پہلے اجلاس میں شرکت کی باضابطہ دعوت دی ہے۔
سحرنیوز/پاکستان: پاکستانی سینیٹ کے اسپیکر کی مشیر محترمہ مصباح گوہر اور اسلام آباد میں متعین ایران کے ڈپٹی ایمبسیڈر نبی شیرازی کے درمیان ہونے والی ملاقات کے دوران پاکستانی سینیٹ کے چیرمین سید یوسف رضا گیلانی کی جانب سے اسپیکر ڈاکٹر باقر قالیباف کو دورہ پاکستان اور آئی ایس سی کانفرنس میں شرکت کا باضابطہ دعوت نامہ پیش کیا گیا۔
اس ملاقات میں ایران کے صوبہ گیلان کے شہر رشت اور پاکستان کے شہر ملتان کو جڑواں شہر قرار دینے کے بارے میں پاکستانی سینیٹ کے چیرمین کا نقطہ نظر پیش کیا گیا جس کا مقصد دونوں دوست اور ہمسایہ ممالک کے درمیان ثقافتی، تاریخی اور اقتصادی تعلقات کو تقویت دینا ہے۔
بین الپارلیمانی اسپیکرز کانفرنس (ISC) کا پہلا ورکنگ سیشن سینیٹ آف پاکستان کی میزبانی میں 11-12 نومبر کو اسلام آباد میں ہوگا۔
اس کانفرنس کے انقعاد کا مقصد، عالمی امن و سلامتی کے قیام، نیز مشترکہ عالمی چیلنجوں سے نمٹنے کے لیے پارلیمانی رہنماؤں کے درمیان بات چیت کو مضبوط بنانے پر توجہ مرکوز کرنا ہے۔
