پاکستان اور افغانستان دہشت گردی پر قابو پانے کے لئے سنجیدہ کوششیں کریں گے: پاکستان کے وزیر دفاع خواجہ آصف
پاکستان کے وزیر دفاع خواجہ آصف نے کہا ہے کہ پاکستان اور افغانستان متفق ہیں کہ دہشت گردی کا فوری خاتمہ ضروری ہے اور یہ کہ دونوں ممالک دہشت گردی پر قابو پانے کے لئےسنجیدہ کوششیں کریں گے۔
سحرنیوز/پاکستان: قطری ٹی وی کو انٹرویو دیتے ہوئے پاکستان کے وزیر دفاع خواجہ محمد آصف نے کہا کہ پاکستان اور افغانستان کے درمیان معاہدے کا بنیادی مقصد دہشت گردی کے مسئلے کو ختم کرنا ہے۔ انھوں نے کہا کہ دہشت گردی برسوں سے پاکستان اور افغانستان کے سرحدی علاقوں کو متاثر کررہی ہے اور گزشتہ ہفتے دہشت گردی کا مسئلہ دونوں ممالک کے درمیان براہِ راست جھڑپ تک پہنچ گیا تھا۔
خواجہ آصف کا کہنا تھا کہ جنگ بندی معاہدے کی تفصیلات کو حتمی شکل دینے کے لئے ایک اور اجلاس آئندہ ہفتے استنبول میں ہو گا۔ یہ معاہدہ بنیادی طور پر قطر اور ترکیہ کی ثالثی سے ہوا ہے۔
انہوں نے کہا کہ قطر کے امیر شیخ تمیم بن حمد آل ثانی، ترک صدر رجب طیب اردوغان اور ترک وفد کے سربراہ کا شکریہ ادا کرتے ہیں۔
واضح رہے کہ ہفتے کی رات دوحہ میں پاکستان اور افغانستان کے مذاکرات کے بعد جنگ بندی پر اتفاق ہوا تھا۔
