ملکی ترقی کے سفر میں ہم سب کو شریک ہو کر اپنا کردار ادا کرنا ہوگا: پاکستانی وزیر اعظم شہباز شریف
اطلاعات کے مطابق پاکستان کے وزیر اعظم شہباز شریف نے کہا ہے کہ ملکی ترقی کے لئے ہم سب کو شریک ہو کر آگے بڑھنا اور سب کو اپنا کردار ادا کرنا ہوگا۔
سحرنیوز/پاکستان: پاکستانی میڈیا ذرائع کی رپورٹ کے مطابق بلوچستان ورکشاپ کے شرکا سے خطاب کے دوران شہباز شریف نے کہا کہ اللہ تعالیٰ نے بلوچستان کو بے شمار قدرتی وسائل سے نوازا لیکن افسوس، بلوچستان کی دولت اب بھی زمین کے اندر دفن ہے، بلوچستان کی تاریخ، ثقافت اور روایات اسے منفرد بناتی ہیں۔
پاکستانی وزیر اعظم نے کہا کہ بلوچ رہنماؤں نے رضاکارانہ طور پر پاکستان سے الحاق کا تاریخی فیصلہ کیا تھا، بلوچستان کے عوام ہمیشہ سے کشادہ دل اور مہمان نواز رہے ہیں اور یہ کہ بلوچستان میں مختلف برادریوں کے درمیان دیر پا ہم آہنگی قائم رہی۔
ان کا کہنا تھا کہ بلوچستان کی جغرافیائی ساخت، ترقی کے سفر میں چیلنج بن گئی، صوبے میں دور دراز کے علاقوں تک بجلی کی فراہمی اور سڑکوں کی تعمیر بڑا مسئلہ ہے جب کہ سڑکوں کے مضبوط نیٹ ورک کے بغیر تعلیم اور صنعت کی ترقی ممکن نہیں ہے۔
وزیراعظم شہباز شریف نے کہا کہ بلوچستان کی ترقی ملک کی مجموعی خوش حالی سے وابستہ ہے، گزشتہ عشروں میں بلوچستان کو نظر انداز کرنا خود احتسابی کا لمحہ ہے جب کہ وفاق کی روح باہمی قربانی اور بھائی چارے میں پوشیدہ ہے۔
انہوں نے کہا کہ ہم پہلے پاکستانی اور بعد میں صوبوں کے مکین ہیں، ہمیں وعدہ کرنا ہوگا کہ ہم سب ملکر ملکی ترقی میں اپنا کردار ادا کریں گے، بلوچستان کے عوام ہمارے بھائی ہیں۔
