شہباز شریف ریاض کے دورے پر، پاکستانی وزیر اعظم کو محمد بن سلمان کی خصوصی دعوت
سعودی ولی عہد و وزیرِ اعظم محمد بن سلمان کی خصوصی دعوت پر پاکستان کے وزیرِ اعظم شہباز شریف فیوچر انویسٹمنٹ انیشی ایٹو کی نویں کانفرنس میں شرکت کے لیے پاکستانی وفد کے ہمراہ ریاض پہنچ گئے۔
سحرنیوز/پاکستان: موصولہ اطلاعات کے مطابق، پاکستان کے نائب وزیرِ اعظم و وزیرِ خارجہ سینیٹر محمد اسحاق ڈار، وفاقی وزیرِ خزانہ محمد اورنگزیب، وفاقی وزیرِ اطلاعات و نشریات عطاء اللہ تارڑ، معاونین خصوصی طارق فاطمی اور بلال بن ثاقب، پاکستانی وزیرِ اعظم کے ہمراہ اعلیٰ سطح وفد میں شریک ہیں۔ یاد رہے کہ سعودی عرب کے ولی عہد محمد بن سلمان کی خصوصی دعوت پر پاکستان کے وزیر اعظم ریاض دورے پر گئے ہیں۔
ریاض میں منعقدہ فیوچر انویسٹمنٹ انیشی ایٹو جس میں عالمی رہنما، سرمایہ کار، پالیسی ساز اور دیگر شعبوں کے نامور لوگ شرکت کررہے ہیں۔ جہاں وزیرِ اعظم محمد شہباز شریف پاکستان کی نمائندگی کر رہے ہیں۔ شہباز شریف پائیدار ترقی، اقتصادی شمولیت، جدت اور عالمی جغرفیائی سیاست میں تبدیلیوں پر ہونے والی گفتگو میں شرکت اور پاکستان کا نقطہ نظر پیش کریں گے۔
شہباز شریف اپنے دورے کے دوران سعودی قیادت سے ملاقاتیں بھی کریں گے جن میں پاکستان و سعودی عرب کے مابین تجارت، سرمایہ کاری، توانائی اور افرادی قوت کے شعبوں میں تعاون کو مزید وسعت دینے کے حوالے سے گفتگو ہو گی، ملاقاتوں میں باہمی دلچسپی کے عالمی و علاقائی امور پر بھی گفتگو ہوگی۔
وزیرِاعظم فیوچر انویسٹمنٹ انیشی ایٹو میں شرکت کے لیے آئے عالمی رہنماؤں اور بین الاقوامی اداروں کے سربراہان سے ملاقاتیں بھی کریں گے، ان ملاقاتوں میں پاکستان میں سرمایہ کاری اور پائیدار ترقی کے حوالے سے تعاون کی استعداد پر گفتگو ہو گی۔
