پاکستانی صوبۂ پنجاب کی وزیراعلیٰ مریم نواز کا دورۂ امریکہ کا مقصد خفیہ؟
پاکستان کے صوبۂ پنجاب کی وزیراعلیٰ مریم نواز ایسے حالات میں کہ ملکی سیاست میں شدید ہلچل مچی ہوئی ہے، امریکہ کے دورے پر نیو یارک پہنچ گئيں۔
سحرنیوز/پاکستان: پاکستانی میڈیا ذرائع کی آج کی رپورٹ کے مطابق وزیراعلیٰ پنجاب مریم نواز پاکستان میں 27 ویں آئینی ترمیم کے مجوزہ معاملے پر ملکی سطح پر جاری شدید سیاسی ہلچل کے درمیان نیویارک پہنچ گئی ہیں۔
مذکورہ ذرائع نے بتایا کہ مریم نواز جمعہ کی شام امریکہ (نیو یارک) پہنچی تھیں اور متوقع طور پر اتوار کو کسی دوسری امریکی ریاست کا سفر کرنے کی اطلاعات ہیں۔
پاکستانی ذرائع ابلاغ کا کہنا ہے کہ سفارتی اور سرکاری حلقوں کے مطابق اس دورے کا مقصد خفیہ رکھا گیا ہے تاہم نیویارک میں پاکستان مسلم لیگ کے ذرائع طبی وجوہات کو خارج از امکان قرار نہیں دے رہے ہیں۔
مبصرین کے مطابق مریم نواز کے اس دورے کا وقت خاصا اہم ہے، وفاقی کابینہ نے ابھی ترمیم کا مسودہ منظور کیا تھا اور بِل ایوان بالا میں پیش کیا گیا ہے، جس سے اس کے اثرات پر شدید بحث چھڑ گئی۔
واضح رہے کہ پنجاب کی وزیراعلیٰ مریم نواز برازیل میں ہونے والی "کوپ 30 ایمیزونیا بیلیم 2025" میں شرکت کے لئے گزشتہ ہفتے روانہ ہوئی تھیں۔
پنجاب حکومت کی جانب سے بتایا گیا تھا کہ وزیراعلیٰ مریم نواز پنجاب کی نمائندگی کریں گی، جن کے ساتھ سینیئر صوبائی وزیر مریم اورنگزیب بھی ہوں گی۔
