اسرائیل کے ساتھ جنگ کی صورت میں حزب اللہ ہمیں نابود کر دے گا، نتن یاہو کا پاگل پن ہمیں لے ڈوبے گا: یونا یہاؤ
ایک صیہونی میڈیا کے مطابق اگر لبنان سے وسیع جنگ شروع ہوگئی تو مقبوضہ فلسطین کی حیفا بندرگاہ پر روزانہ حزب اللہ کے ٹھیک نشانے پر لگنے والے 4000 میزائل گریں گے۔
سحرنیوز/دنیا: ارنا نے صیہونی حکومت کے چینل 12 کے حوالے سے رپورٹ دی ہے کہ مقبوضہ فلسطین کے ساحلی شہر حیفا کے میئر نے کہا ہے کہ "ہمارے سامنے حقیقی خطرہ موجود ہے، حزب اللہ ہمیں نابود کردے گی۔"
اس رپورٹ کے مطابق حیفا کے میئر نے کہا کہ نتن یاہو کی حکومت کچھ بھی نہیں کر رہی ہے، اس نے شمالی مقبوضہ فلسطین کو اس کے حال پر چھوڑ دیا ہے۔ حیفا کے میئر یونا یہاؤ نے مزید کہا ہے کہ حزب اللہ نے 2006 میں 33 روزہ جنگ میں حیفا پر صرف 200 میزائل داغے تھے جو پن پوائنٹ نہیں تھے لیکن اب وہ حیفا پر روزانہ 4000 ایسے میزائل داغ سکتا ہے جو ٹھیک نشانے پر لگیں گے۔ انھوں نے کہا کہ حزب اللہ کی اس صلاحیت نے حالات بالکل مختلف کردیئے ہیں اور جنگ کی صورت میں ہمارے سامنے بالکل نیا سیناریو ہوگا۔
حیفا کے میئر کا کہنا ہے کہ 2006 کی 33 روزہ جنگ میں، اس وقت کے وزیر اعظم ایہود اولمرت اور ان کی کابینہ کے اراکین جنگ کی اوج کے زمانے میں کسی خوف کے بغیر حیفا آتے تھے لیکن اب یہاں کوئی نہیں آرہا ہے۔ اسی سلسلے میں المیادین نے صیہونی میڈیا کے حوالے سے رپورٹ دی ہے کہ صیہونی کالونیوں کے ساکنین کو حیفا کے صنعتی کارخانوں کے نشانہ بننے کا خوف ہے۔
اس رپورٹ کے مطابق حال حاضر میں مقبوضہ فلسطین کے شہر حیفا میں 32 لاکھ افراد ایسے علاقوں میں رہتے ہیں کہ صنعتی کارخانوں کے نشانہ بننے کی صورت میں وہ محفوظ نہیں رہیں گے۔ المیادین کے مطابق خلیج حیفا میں 1 ہزار پانچ سو خطرناک قسم کے مواد موجود ہیں اور اگر یہ نشانہ بنے تو یہ مواد فضا میں منتشر ہوجائيں گے اور پھر جو ہوگا اس کا تصور بھی ہولناک ہے۔
صیہونی میڈیا نے اسی طرح رپورٹ دی ہے کہ شمالی مقبوضہ فلسطین کا علاقہ الجلیل حزب اللہ کے حملوں سے 70 فیصد تباہ ہوچکا ہے۔ صیہونی میڈیا کے مطابق شمالی مقبوضہ فلسطین کا شہر کریات شمونہ حزب اللہ کے حملوں کے نتیجے میں ساکنین سے خالی ہوچکا ہے اور یہاں کے ساکنین واپس آنے کے بارے میں سوچ بھی نہیں پا رہے ہیں۔
