امریکی یونیورسٹی میں فائرنگ سے 17 افراد ہلاک و زخمی
امریکی ریاست الاباما میں واقع ٹسکیگی یونیورسٹی میں ہونے والی فائرنگ میں ایک شخص ہلاک اور سولہ زخمی ہوگئے ہیں۔
سحر نیوز/ دنیا: غیر ملکی میڈیا کی رپورٹ کے مطابق ٹسکیگی یونیورسٹی میں اتوار کے دن ایک جشن منایا جا رہا تھا کہ یونیورسٹی کیمپس میں فائرنگ سے ہنگامہ ہوگیا ۔ اس فائرنگ میں ایک اٹھارہ سالہ نوجوان جان سے ہاتھ دھو بیٹھا۔ بتایا گیا ہے کہ فائرنگ ميں مارا جانے والا نوجوان، یونیورسٹی کا طالب علم نہيں تھا لیکن زخمی ہونے والوں میں طلبا بھی شامل ہیں۔
مقامی حکام نے بتایا ہے کہ زخمی ہونے والے سولہ افراد میں سے بارہ گولی لگنے سے زخمی ہوئےہیں ۔ فائرنگ اس وقت ہوئی جب جشن اختتام کے قریب تھا جو ہر سال سیاہ فام طلبا کو یونیورسٹی میں ویلکم کرنے کے لئے منعقد ہوتا ہے۔
امریکی پولیس نے بتایا ہے کہ ابھی تک فائرنگ کرنے والے کو گرفتار نہیں کیا گیا ہے۔ اس فائرنگ کے بعد پیر کو یونیورسٹی کی سبھی کلاسوں کی چھٹی کردی گئی۔
