امریکہ: برفانی طوفان کی تباہی، 10 افراد ہلاک، درجۂ حرارت منفی 49

Jan ۲۶, ۲۰۲۶ ۱۵:۱۶ Asia/Tehran

امریکہ میں تباہ کن برفانی طوفان کے نتیجے میں 10 افراد ہلاک ہوگئے ہیں اور بعض علاقوں میں درجۂ حرارت منفی 49 تک پہنچ گیا۔

سحرنیوز/دنیا: میڈیا ذرائع کے مطابق امریکہ کے ایک بڑے حصے میں خطرناک برفانی طوفان نے وسیع تباہی مچائی ہے، 22 ریاستیں اس بھیانک اور تباہ کن برفانی طوفان کی زد میں ہیں جہاں نظامِ زندگی بُری طرح مفلوج ہوگیا ہے۔

خبروں کے مطابق امریکہ کے 10 لاکھ افراد بجلی سے محروم ہوگئے ہیں جبکہ ملک کی 18 ریاستوں میں ایمرجنسی نافذ کر دی گئی ہے۔ اطلاعات کے مطابق تیز ہواؤں اور شدید سردی کے باعث 16 ہزار سے زیادہ پروازیں منسوخ کرنی پڑی ہیں۔ نیویارک کے دیہی علاقوں میں درجۂ حرارت منفی 49 تک پہنچ جانے کی خبریں بھی موصول ہوئی ہیں۔

اس دوران نیویارک کے میئر نے شہریوں کو غیر ضروری سفر سے گریز اور گھروں میں رہنے کی ہدایات جاری کی ہیں جب کہ 9 ریاستوں میں نیشنل گارڈ اہلکاروں کو متحرک کردیا گیا ہے۔ حکام کے مطابق صورت حال پر کڑی نظر رکھی جا رہی ہے اور امدادی کارروائیاں بھی جاری ہیں۔

ہمیں فالو کریں:

دریں اثنا امریکہ کے محکمۂ موسمیات نے کہا ہے کہ برف بہت آہستہ آہستہ پگھلے گی اور جلدی کم نہیں ہوگی، جس سے امدادی سرگرمیوں میں نمایاں طور پر رکاوٹ پیدا ہوگی۔