سعودی عرب المناک بس حادثہ: ہندوستان کے اعلیٰ سطحی سرکاری وفد کی مدینہ روانگی
سعودی عرب کے مقدس شہر مدینہ کے نزدیک پیش آنے والے المناک بس حادثے میں 40 سے زیادہ ہندوستانی شہری جاں بحق ہوگئے تھے۔ اسی سلسلے میں ہندوستان کا ایک اعلیٰ سطحی سرکاری وفد سعردی عرب کے لئے روانہ ہو رہا ہے۔
سحرنیوز/ہندوستان: ہندوستانی میڈیا رپورٹوں کے مطابق ہندوستان کی وزارتِ خارجہ نے ایک بیان میں کہا ہے کہ حکومت اس المناک واقعے پر گہرے دکھ کا اظہار کرتی ہے۔ وزارت خارجہ کے بیان میں کہا گیا ہے کہ ہم جاں بحق ہونے والے تمام شہریوں کے اہل خانہ سے تعزیت پیش کرتے ہیں اور زخمیوں کی جلد صحت یابی کی دعا کرتے ہیں۔
دریں اثنا، ہندوستان کی مرکزی حکومت نے فوری اقدامات کرتے ہوئے اعلان کیا ہے کہ ایک اعلیٰ سطحی وفد، جس کی قیادت آندھرا پردیش کے گورنر جسٹس ایس عبدالنذیر کر رہے ہیں، آج سعودی عرب روانہ ہو رہا ہے۔ اس وفد میں وزارتِ خارجہ کے سینئر افسر ارون کمار چٹرجی بھی شامل ہوں گے۔ وفد کا مقصد مقامی حکام کے تعاون سے امدادی کاموں کی نگرانی، متاثرہ خاندانوں کی مدد اور ضروری انتظامات کو تیز کرنا ہے۔
ادھر تلنگانہ حکومت نے بھی اس حادثے پر افسوس کا اظہار کرتے ہوئے جاں بحق ہونے والے ریاستی شہریوں کے اہل خانہ کے لیے پانچ پانچ لاکھ روپے مالی امداد کا اعلان کیا ہے۔ یہ فیصلہ تلنگانہ کے وزیر اعلیٰ اے ریونت ریڈی کی صدارت میں ہونے والے کابینہ اجلاس میں کیا گیا۔
دوسری جانب، پارلیمانی اور اقلیتی امور کے مرکزی وزیر کرن رجیجو نے سوشل میڈیا پلیٹ فارم ایکس پر اطلاع دی ہے کہ مدینے میں ہندوستانی حجاج کرام کے دفتر میں ایک ’کیمپ آفس قائم کر دیا گیا ہے، جہاں متاثرہ افراد کے لواحقین اور زخمی مسافروں کو ہر قسم کی رہنمائی اور مدد فراہم کی جا رہی ہے۔
واضح رہے کہ سعودی عرب میں اتوار اور پیر کی درمیانی رات ایک بھیانک سڑک حادثے میں کم سے کم 45 ہندوستانی عمرہ زائرین جاں بحق ہوگئے تھے اور جاں بحق ہونے والے زیادہ تر زائرین کا تعلق ریاست تلنگانہ کے صدر مقام حیدر آباد سے تھا۔
