ہندوستان: خطرناک آلودگی سے پریشان 80 فی صد افراد دہلی کو خیرباد کہنے کے خواہش مند، سروے رپورٹ
ہندوستان کے دارالحکومت دہلی میں فضائی آلودگی اتنی خطرناک ہوچکی ہے کہ ایک سروے کے مطابق 80 فی صد افراد دہلی کو خیرباد کہنا چاہتے ہیں۔
سحرنیوز/ہندوستان: ہندوستانی میڈیا رپورٹوں کے مطابق دہلی میں فضائی آلودگی بہت خطرناک حد تک بڑھ چکی ہے، شہر کی ہوا مسلسل زہریلی ہوتی جا رہی ہے اور تازہ سروے سے ایک حیرت انگیز بات سامنے آئی ہے کہ علاقے کی اکثریت یہاں سے چلے جانے کی خواہش مند ہے۔
"سمیٹن پلس اے آئی" کے سروے کے مطابق دہلی اور این سی آر میں رہنے والے 80 فی صد افراد فضائی آلودگی کی وجہ سے اس علاقے کو اب خیرباد کہنا چاہتے ہیں۔
دہلی اور نیشنل کیپیٹل ریجن، این سی آر یعنی قومی دارالحکومت خطہ، دہلی اور اس کے چاروں طرف واقع آس پاس کے کئی ریاستوں کے علاقے کو کہا جاتا ہے۔ گڑگاؤں، نوئیڈا، غازی آباد اور فرید آباد بھی اسی علاقے میں شامل ہیں۔
سروے کے مطابق دہلی اور این سی آر کے 80 فی صد سے زیادہ لوگ مسلسل کھانسی، تھکن اور سانس میں جلنی جیسی مشکلات سے دوچار ہیں اور ایک سال میں 68 اعشاریہ 3 فی صد لوگوں کو آلودگی سے متعلق بیماریوں کے لیے طبی مدد لینی پڑی ہے۔
سروے سے پتہ چلا ہے کہ 33 اعشاریہ 6 فی صد لوگ سنجیدگی سے شہر چھوڑنے کے بارے میں سوچ رہے ہیں۔ علاوہ ازیں 15 اعشاریہ 2 فی صد فی صد افراد پہلے ہی دوسرے شہروں میں جا بسے ہیں۔ کئی خاندانوں نے تو نئے گھر دیکھنا، بچوں کے اسکول تلاش کرنا اور نئے شہروں میں ممکنہ مقامات دیکھنا بھی شروع کر دیا ہے۔
سروے سے ظاہر ہوتا ہے کہ 76 اعشاریہ 4 فی صد لوگوں نے روزمرہ کی بیرونی سرگرمیاں بھی کافی کم کر دی ہیں۔ کئی خاندانوں کا کہنا ہے کہ بچوں کو روز باہر کھیلنے دینا تو دور، اب اسکول بھیجنے سے بھی انہیں ڈر لگتا ہے۔
ہمیں فالو کریں:
Follow us: Facebook, X, instagram, tiktok
ادھر ماہرین کا کہنا ہے کہ اعداد و شمار بتاتے ہیں کہ دہلی میں فضائی آلودگی اب صرف ایک موسم یا محکمۂ موسمیات کا مسئلہ نہیں رہا بلکہ ایک سنگین ’بحرانِ صحت‘ بن چکا ہے۔
