امریکی - اسرائیلی منصوبے کے خلاف مضبوط موقف اپنایا جائے: ایران و سعودی عرب
ایران کے وزیر خارجہ نے اپنے سعودی ہم منصب سے ٹیلی فونی گفتگو میں فلسطینیوں کے بارے میں صہیونی وزیراعظم کے عزائم کو جارحیت کی انتہا اور خطے کے امن و سلامتی کے لیے سنگین خطرہ قرار دیا۔
سحر نیوز/ ایران: ایران کے وزیرخارجہ سید عباس عراقچی نے علاقائی امور، بالخصوص مقبوضہ فلسطین اور غزہ کی صورتحال پر سعودی وزیر خارجہ فیصل بن فرحان سے ٹیلی فونی گفتگو کی۔
سید عباس عراقچی نے غزہ کے عوام کو جبری بےدخل کرکے دیگر ممالک میں پناہ گزین بنانے کے امریکی اور صہیونی منصوبے کو فلسطین کے نوآبادیاتی خاتمے کی سازش کا ایک حصہ قرار دیا اور عالمی برادری سے اس کے خلاف مؤثر کارروائی کا مطالبہ کیا۔انہوں نے مزید کہا کہ صیہونی وزیراعظم کے یہ توہین آمیز بیانات نہ صرف قابض حکومت کے بےانتہا غرور کی علامت ہیں بلکہ خطے میں امن و استحکام کے لیے خطرہ بھی ہیں۔ انہوں نے اس بیان کی شدید مذمت کی اور اسے ناقابل قبول قرار دیا۔
ایران کے وزیر خارجہ نے اسلامی ممالک کے وزرائے خارجہ سے اپنی مشاورت کا حوالہ دیتے ہوئے کہا کہ او آئی سی کی طرف سے امریکی-اسرائیلی منصوبے کے خلاف مضبوط موقف اپنائے جانے کی ضرورت ہے۔انہوں نے عالمی برادری، خصوصا خطے اور اسلامی دنیا کے تمام ممالک پر زور دیا کہ وہ صہیونی حکومت کے خلاف فوری اقدامات کریں۔
سعودی وزیر خارجہ امیر فیصل بن فرحان نے گفتگو کے دوران اس مؤقف کو دہرایا کہ سعودی عرب فلسطینیوں کو جبری طور پر غزہ سے نکالنے کے کسی بھی منصوبے کو سختی سے مسترد کرتا ہے۔ انہوں نے اسلامی تعاون تنظیم کے وزرائے خارجہ کے اجلاس کے انعقاد سے متعلق ایران کی تجویز کی حمایت کا اعلان کیا۔
علاوہ برایں انہوں نے ایران کے ساتھ دوطرفہ تعلقات کو فروغ دینے اور علاقائی امور پر مشاورت جاری رکھنے کی اہمیت پر بھی زور دیا۔
