اقوام متحدہ کو ایران، روس اور چین کا خط تینوں بڑی طاقتوں کے اتحاد کی علامت: ایرانی اسپیکر
ایرانی پارلیمنٹ کے اسپیکر محمد باقر قالیباف نے کہا ہے کہ اسلامی جمہوریہ ایران، روس اور چین کی وزارت خارجہ کی طرف سے اقوام متحدہ کو لکھا گیا خط تینوں بڑی طاقتوں کے اتحاد کی علامت ہے۔
سحر نیوز/ ایران: ارنا کی رپورٹ کے مطابق ایرانی پارلیمنٹ، مجلس شورائے اسلامی، کے اسپیکر محمد باقر قالیباف نے کہا کہ قرارداد 2231 کی میعاد ختم ہونے کے ساتھ ہی ایران کے ایٹمی پروگرام پر عمل درآمد کی نگرانی اور تصدیق کے سلسلے میں بین الاقوامی ایٹمی توانائی ایجنسی، آئي اے ای اے، کے ڈائریکٹر جنرل کا رپورٹنگ مشن بھی ختم ہو گیا ہے۔
انہوں نے کہا کہ اسلامی جمہوریہ ایران، روسی فیڈریشن اور عوامی جمہوریہ چین کی وزارت خارجہ کی طرف سے اقوام متحدہ کے سیکریٹری جنرل اور سلامتی کونسل کے صدر کے نام خط ان تینوں عظیم طاقتوں کی اسٹریٹجک یکجہتی کی علامت ہے جس میں واضح طور پر کہا گیا ہے کہ اسنیپ بیک میکینزم کو فعال کرنے کے لئے تین یورپی ممالک کی کوششیں بنیادی طور پر قانونی جواز سے عاری ہیں۔
ایران کے اسپیکر محمد باقر قالیباف نے کہا کہ قرارداد 2231 میں درج تمام پابندیاں اور تقاضے ختم ہوچکے ہیں اور یہ کہ منسوخ شدہ قراردادوں کی بحالی کا بھی کوئی امکان نہیں ہے۔ محمد باقر قالیباف کا کہنا تھا کہ یورینیم کی افزودگی کے ایران کے حق کو تسلیم کرتے ہوئے ایٹمی معاملہ بھی سلامتی کونسل کے ایجنڈے سے خارج ہوگیا ہے۔
