ایران اور ترکیہ کے وزرائے خارجہ کی مشترکہ پریس کانفرنس، فلسطین اور غزہ کے مسئلے پر مشترکہ تعاون کی ضرورت پر زور-

Nov ۳۰, ۲۰۲۵ ۱۹:۳۸ Asia/Tehran

ترکیہ کے وزیر خارجہ نے تہران میں ایران کے وزیر خارجہ سے ملاقات کے بعد مشترکہ پریس کانفرنس سے خطاب کیا-

سحرنیوز/ایران: رپورٹ کے مطابق، ترکیہ کے وزیر خارجہ ہاکان فیدان نے، جو آج صبح تہران پہنچے ہیں، وزارت خارجہ کے دفتر میں اپنے ایرانی ہم منصب سید عباس عراقچی سے ملاقات کی۔ ایران اور ترکیہ کے وزرائے خارجہ نے ملاقات و گفتگو کے بعد مشترکہ پریس کانفرنس سے خطاب کیا ۔

سید عباس عراقچی نے اپنے ترک ہم منصب کے ساتھ مشترکہ پریس کانفرنس میں دونوں ممالک کے درمیان تجارت اور سرمایہ کاری کی راہ میں حائل رکاوٹوں کو دور کرنے کی ضرورت پر زور دیا اور کہا کہ مسائل کو خاص طور پر دونوں ممالک کے درمیان اعلیٰ تعاون کونسل اور مشترکہ اقتصادی کمیشن کے انعقاد کے ذریعے حل کئے جانے کا فیصلہ کیا گیا-

ایرانی وزیرخارجہ نے کہا کہ ایران اور ترکیہ نہ صرف دو پڑوسی ممالک ہیں بلکہ دو دوست اور برادر ملک بھی ہیں جن میں بہت گہری تاریخی، مذہبی اور ثقافتی مماثلتیں پائی جاتی ہیں اور ہماری سرحدیں صدیوں سے امن و دوستی کی سرحدیں ہیں –

ہمیں فالو کریں:

ایران کے وزیرخارجہ نے کہا کہ علاقائی مسائل کے سلسلے میں، ہم نے مسٹر ہاکان فیدان کے ساتھ طویل بات چیت کی اور دونوں فریقوں کے درمیان خطے میں بہت سی چیزیں مشترک ہیں اور قدرتی طور پر مشترکہ تحفظات بھی ہیں۔

انھوں نے کہا کہ مسئلہ فلسطین اور غزہ کے مظلوم عوام کے قتل عام کو روکنے کے لیے مشترکہ تعاون کی ضرورت آج کی بات چیت کے اہم ترین موضوعات میں سے تھی۔ سید عباس عراقچی نے کہا کہ لبنان اور شام پر صیہونی حکومت کے حالیہ حملوں اور غزہ میں مسلسل جنگ بندی سمجھوتے کی خلاف ورزی سے پتہ چلتا ہے کہ صیہونی حکومت اس علاقے کو غیرمستحکم کرنے کے لئے ایک بڑی سازش پر عمل پیرا ہے ۔

سید عباس عراقچی نے جوہری مذاکرات اور ایران پر سے پابندیوں کے خاتمے کا حوالہ دیتے ہوئے کہا کہ آج کی ملاقات میں ہم نے ایرانی جوہری مسئلے اور جابرانہ امریکی پابندیوں ، اسنیپ بیک اور سلامتی کونسل میں جو کچھ ہوا اس کے بارے میں بھی تفصیل سے گفتگو ہوئی –