SAHAR

صیہونی حکومت کے ذرائع ابلاغ نے اعلان کیا ہے کہ مزاحمتی قوتوں کے میزائل حملوں کے خدشے کے پیش نظر اس حکومت کے سیکورٹی اداروں کو چوکس کر دیا گیا ہے۔

سحر نیوز/ عالم اسلام: موصولہ رپورٹ کے مطابق اس غاصب حکومت کے سیکورٹی اداروں نے غزہ کی پٹی سے بالخصوص بیت حانون کی سرحدی گزرگاہ کے بند ہونے کے بعد ان علاقوں سے ممکنہ طور پر راکٹ فائر کئے جانےکے خوف سے اپنی فوج کو الرٹ کردیا ہے -

واضح رہے کہ صیہونی حکام نے غزہ کی سرحد پر بیت حانون کراسنگ کو چار روز سے بند کر رکھا ہے اور وہ فلسطینی شہریوں اور بیماروں کو وہاں سے گزرنے کی اجازت نہیں دے رہے ہيں-

پیر کے روز غاصب صہیونی فوج نے غزہ کے مشرق میں واقع سرحدی پٹی میں فلسطینی مظاہرین پر فائرنگ کی تھی جس کے نتیجے میں چھ افراد زخمی ہوگئے تھے۔

ایسے وقت میں صیہونی حکومت کے سیکورٹی ادارے میزائل حملوں کے خدشے کے پیش نظر چوکس ہیں کہ جب مقامی ذرائع نے گزشتہ ہفتے کے روز اطلاع دی تھی کہ غزہ کے مزاحمتی گروہوں نے اس علاقے سے سمندر کی طرف کم از کم ایک میزائل داغا ہے تاکہ اپنی فوجی طاقت و صلاحیت کا مظاہرہ کرسکیں - دریں اثناگزشتہ اگست میں بھی غزہ میں مزاحمت نے اپنی جنگی صلاحیتوں کو بڑھانے اور طاقت کے مظاہرے کے لیے سمندر کی طرف کئی میزائل تجربات کیے تھے۔