شہید حسن نصراللہ کے چہلم کے موقع پر حزب اللہ نے کی تل ابیب پر میزائلوں کی بارش، بن گورین ایئرپورٹ بند، ہر طرف افراتفری
حزب اللہ کے مجاہدین نے تل ابیب اور بن گوریون بین الاقوامی ہوائی ایئرپورٹ کو میزائلوں سے نشانہ بنایا۔
سحر نیوز/ عالم اسلام: المیادین کی رپورٹ کے مطابق مقبوضہ فلسطین کے شمال اور مرکز میں خطرے کے سائرن بجنے کی آوازیں سنی گئیں۔
سائرن کی آواز تل ابیب کے شمال اور دوسرے علاقوں میں سنی گئی ۔ لبنان سے میزائلی حملوں کے بعد دھماکوں کی آوازیں بھی سنی گئیں۔
صہیونی میڈیا نے اطلاع دی ہے کہ تل ابیب میں 10 دھماکوں کی آوازیں سنی گئیں اور آئرن ڈوم کو حزب اللہ کی طرف سے فائر کیے گئے میزائلوں کو روکنے کے لیے فعال کیا گیا ۔
بعض عبرانی ذرائع نے اطلاع دی ہے کہ لبنان سے تل ابیب کی طرف 11 میزائل داغے گئے۔
ان ذرائع نے بتایا کہ میزائل بین گوریون ایئرپورٹ کے قریب گرے۔ مذکورہ ذرائع نے میزائل حملے کے بعد بین گوریون ہوائی اڈے پر پروازیں معطل کرنے کا اعلان کیا۔
کچھ ذرائع نے اعلان کیا کہ بوئنگ 777 طیارے کو نقصان پہنچا ہے۔
بعض ذرائع نے اعلان کیا کہ تل ابیب کے کفر حباد میں ٹرینوں کی آمد و رفت روک دی گئی اور میزائل حملے کے بعد مسافر فرار ہوگئے۔
صیہونی حکومت کے ذرائع ابلاغ نے اطلاع دی ہے کہ مقبوضہ فلسطین کے شمال میں 150 شہروں اور قصبوں میں خطرے کے سائرن بجنے کی آوازیں سنی گئیں۔
ان ذرائع ابلاغ نے اعلان کیا کہ شہید سید حسن نصر اللہ کے چہلم کے موقع پر لبنان سے میزائلوں کی بارش کی گئی۔
