سرِلا مکاں سے طلب ہوئی سوئے مُنتہیٰ وہ چلے نبی، معراج النبیﷺ آپ سب کو مبارک ہو
رحمتوں اور برکتوں والی رات شبِ معراج آج مذہبی عقیدت و احترام کے ساتھ منائی جا رہی ہے۔
سحر نیوز/ عالم اسلام: شب معراج کے موقع پر دنیا بھر میں مساجد کو انتہائی خوبصورتی سے سجایا گیا ہے، اس شب مساجد میں چراغاں، خصوصی محافل اور عبادات کا اہتمام کیا جائے گا جس میں علمائے کرام اور مقررین واقعہ معراج اور اس کی فضلیت پر روشنی ڈالیں گے۔
محفل معراج النبیؐ میں نعت خواں حضور اکرمﷺ کی شان مبارک میں ہدیہ عقیدت و نعت پیش کریں گے۔
رحمت للعالمین ختم المرسلین حضرت محمد مصطفیٰ صلی اللہ علیہ والہ وسلم کی یوم بعثت کی آمد پر پورا عالم اسلام جشن و سرور میں ڈوبا ہوا ہے۔
اسی مناسبت سے فرزندان اسلام نے جشن و میلاد کا آغاز کر دیا ہے اور سبھی خدائے رحمان کے آخری نبی رحمت للعالمین کے مبعوث برسالت ہونے کی خوشی نہایت عقیدت و احترام سے منا رہے ہیں۔
ایران و عراق کے سبھی مقامات مقدسہ میں اس وقت فرزندان توحید کا جم غفیر ہے اور لوگ محبوب کبریا کے مبعوث ہونے کی رات کی مناسبت پر مختلف شکلوں میں جشن منانے میں مصروف ہیں ۔ سبھی چھوٹے بڑے شہروں اور قریوں میں شاہراہوں، گلی کوچوں کو آراستہ کیا گیا ہے اور رنگ برنگے پرچموں اور برقی قمقموں سے سجے سبھی مقامات مقدسہ عید بعثت و رسالت کی آمد کا اعلان کر رہے ہیں۔
اس کے علاوہ دیگر ممالک بالخصوص ہندوستان و پاکستان میں بھی جابجا جشنِ بعثت و نبوت کا اہتمام کیا گیا ہے جس میں شمع محمدی کے پروانے ذکر محمدی کے ذریعے اپنی ایمانی جِلا کا سامان فراہم کر رہے ہیں۔
سنہ چالیس عام الفیل یا ہجرت سے تیرہ سال قبل جس وقت آنحضرت صلی اللہ علیہ والہ وسلم شہر مکہ کے قریب واقع غار حرا میں اپنے معبود سے راز و نیاز میں مصروف تھے، تبھی فرشتہ وحی جبرئیل نے نازل ہو کر سلسلہ رسالت کا آخری گوہر آپ کے حوالے کیا اور یوں تا قیام قیامت بشریت کو راہِ سعادت و نجات سے ہمکنار کرنے کے لئے خدائے سبحان کے آخری ضابطہ حیات کے نزول کا آغاز ہو گیا۔
سَرِ لا مکاں سے طلب ہوئی سوئے مُنتہیٰ وہ چلے نبی
کوئی حد ہے ان کے عروج کی۔۔۔ بلغ العلیٰ بکمالہ
سحرعالمی نیٹ ورک خوشی و مسرت کے اس موقع پر اپنے تمام سامعین، ناظرین اور کرم فرماوں کی خدمت میں مبارکباد پیش کرتا ہے۔
